رضا اللہ کی شاندار بیٹنگ، ڈیبیو پر کئی ریکارڈز اپنے نام کرلیے

فاسٹ بولر کی 81 رنز کی جارحانہ اننگز، 9 چھکے لگا کر عالمی ریکارڈ برابر کیا، پاکستان کو اننگز کی شکست سے بچانے میں اہم کردار

برمنگھم: انگلینڈ کے خلاف برمنگھم ٹیسٹ میں ڈیبیو کرنے والے پاکستانی فاسٹ بولر رضا اللہ نے شاندار بیٹنگ کا مظاہرہ کرتے ہوئے 63 گیندوں پر 81 رنز کی جارحانہ اننگز کھیل کر کئی ریکارڈز اپنے نام کرلیے۔

ڈیبیو پر تیز ترین پاکستانی نصف سنچری

رضا اللہ نے دوسری اننگز میں نویں نمبر پر بیٹنگ کرتے ہوئے صرف 43 گیندوں پر نصف سنچری مکمل کی، جس کے ساتھ وہ ٹیسٹ ڈیبیو پر تیز ترین ففٹی بنانے والے پاکستانی بیٹر بن گئے۔

اس سے قبل یہ ریکارڈ فہیم اشرف کے پاس تھا، جنہوں نے 2018 میں ٹیسٹ ڈیبیو پر 52 گیندوں پر نصف سنچری بنائی تھی۔

9 چھکے لگا کر عالمی ریکارڈ برابر

رضا اللہ نے اپنی 81 رنز کی اننگز کے دوران 9 چھکے لگائے اور ٹیسٹ ڈیبیو پر سب سے زیادہ چھکے لگانے کا عالمی ریکارڈ برابر کردیا۔

محمد عباس نے بھی 42 رنز کی اننگز میں 2 چھکے لگائے، یوں برمنگھم ٹیسٹ میں پاکستان کے نمبر 9 سے 11 تک کے بیٹرز نے مجموعی طور پر 10 چھکے لگائے، جو ٹیسٹ کرکٹ میں پہلی بار ہوا۔

15 سال بعد پاکستانی بیٹر کا منفرد کارنامہ

رضا اللہ گزشتہ 15 برس میں پہلے پاکستانی بیٹر بن گئے جنہوں نے ایک ٹیسٹ اننگز میں فاسٹ بولرز کے خلاف 8 چھکے لگائے۔

برمنگھم ٹیسٹ کی پہلی اننگز میں 11 اور دوسری اننگز میں 81 رنز بنانے کے بعد رضا اللہ انگلینڈ کے خلاف ٹیسٹ ڈیبیو پر سب سے زیادہ رنز بنانے والے پاکستانی بیٹر بھی بن گئے۔

انگلینڈ کو 130 رنز کا ہدف

برمنگھم ٹیسٹ میں پاکستان دوسری اننگز میں 449 رنز بنا کر آؤٹ ہوگیا، جس کے بعد انگلینڈ کو میچ جیتنے کے لیے 130 رنز کا ہدف ملا ہے۔

تین ٹیسٹ میچز کی سیریز میں انگلینڈ کو پہلے ہی 2-0 کی فیصلہ کن برتری حاصل ہے۔

Razaullah Stars on Test Debut with 81 Runs and Nine Sixes, Sets Multiple Records Against England