فیلڈ مارشل سید عاصم منیر نے نیشنل ورکشاپ بلوچستان کے شرکاء سے ملاقات میں کہا کہ سیکیورٹی فورسز اور عوام کی مشترکہ کوششوں سے بلوچستان میں پائیدار امن یقینی بنایا جائے گا۔
راولپنڈی: 20ویں نیشنل ورکشاپ بلوچستان کے شرکاء نے فیلڈ مارشل سید عاصم منیر سے ملاقات کی، جس میں بلوچستان کی سیکیورٹی صورتحال، امن و استحکام اور صوبے کی سماجی و معاشی ترقی سے متعلق امور پر تبادلہ خیال کیا گیا۔
آئی ایس پی آر کے مطابق فیلڈ مارشل سید عاصم منیر نے کہا کہ سیکیورٹی فورسز کی مسلسل کوششوں اور عوام کی بھرپور حمایت سے بلوچستان میں پائیدار امن یقینی بنایا جائے گا۔ انہوں نے اس عزم کا اعادہ کیا کہ فتنہ الخوارج اور فتنہ الہندوستان کے خلاف ہدفی کارروائیاں پوری قوت اور عزم کے ساتھ جاری رہیں گی اور پاکستان دہشت گردوں کے نیٹ ورک اور ان کے بنیادی ڈھانچے کے مکمل خاتمے کے لیے پرعزم ہے۔
فیلڈ مارشل نے کہا کہ پاکستان کی مسلح افواج دہشت گرد عناصر کے مذموم عزائم کو ناکام بنانے کی بھرپور صلاحیت رکھتی ہیں۔ انہوں نے بلوچستان میں امن، استحکام اور خوشحالی کے فروغ کے لیے سول سوسائٹی، تعلیمی اداروں، میڈیا اور نوجوانوں کے کردار کو بھی سراہا۔
انہوں نے کہا کہ بلوچستان پاکستان کا فخر ہے اور اس کے محب وطن عوام صوبے کی سب سے بڑی طاقت ہیں۔
آئی ایس پی آر کے مطابق ورکشاپ کے شرکاء نے ملک کے استحکام، ترقی اور خودمختاری کے لیے اپنے اجتماعی عزم کا اعادہ کیا۔ اس موقع پر بتایا گیا کہ وفاقی اور صوبائی حکومتیں بلوچستان کی سماجی و معاشی ترقی اور عوامی فلاح و بہبود کے لیے مختلف ترقیاتی منصوبوں پر عملدرآمد کر رہی ہیں۔
