قلات اور منگچر کے باغات میں انگور کی بہار، ذائقے کے ساتھ روزگار کا ذریعہ

بلوچستان کے قلات اور منگچر کے باغات میں رسیلے انگور کی فصل تیار ہوگئی، مٹھاس اور معیار کے باعث مقامی انگور ملک بھر میں پسند کیے جاتے ہیں جبکہ یہ فصل سینکڑوں خاندانوں کے روزگار کا اہم ذریعہ بھی ہے۔

قلات اور منگچر میں انگور کی بھرپور پیداوار

بلوچستان کے پہاڑوں کے درمیان قلات اور منگچر کے باغات اپنی خوبصورتی، خوشبو اور مٹھاس کے باعث منفرد پہچان رکھتے ہیں۔ یہاں پیدا ہونے والے رسیلے انگور نہ صرف ذائقے میں اپنی مثال آپ ہیں بلکہ مقامی لوگوں کے لیے روزگار کا اہم ذریعہ بھی ہیں۔

قلات اور منگچر کی آب و ہوا انگور کی کاشت کے لیے انتہائی موزوں ہے، جہاں انگور کی مختلف اقسام پیدا ہوتی ہیں جو اپنی مٹھاس، معیار اور ذائقے کے باعث ملک بھر میں پسند کی جاتی ہیں۔

Balochistan’s vineyards produce sweet, quality grapes that support local livelihoods and regional markets.

انگور کی فصل بڑی منڈیوں تک پہنچ گئی

انگور کی فصل جولائی اور اگست کے دوران پک کر تیار ہوتی ہے۔ فصل تیار ہونے کے بعد مقامی زمیندار انگور کی پیداوار کراچی، کوئٹہ اور ملک کی دیگر بڑی منڈیوں تک پہنچاتے ہیں، جہاں اس کی خرید و فروخت کا سلسلہ شروع ہوجاتا ہے۔

انگور کے موسم میں مقامی منڈیوں کی رونق بھی دیدنی ہوتی ہے، جہاں تازہ اور خوش ذائقہ انگور خریداروں کی توجہ کا مرکز بنے رہتے ہیں۔

انگور کی فصل سے ہزاروں خاندان مستفید

انگور کے باغات بلوچستان کے سینکڑوں لوگوں کے لیے روزگار کا اہم ذریعہ ہیں۔ باغبانی سے لے کر انگور کی چنائی، پیکنگ اور ٹرانسپورٹ تک مختلف شعبوں سے وابستہ ہزاروں خاندان اس فصل سے براہِ راست مستفید ہوتے ہیں۔

غذائیت سے بھرپور پھل

ماہرین کے مطابق انگور غذائیت سے بھرپور پھل ہے، جس کا مناسب استعمال قوتِ مدافعت کو بہتر بنانے، دل کی صحت کے لیے مفید ثابت ہونے، نظامِ ہاضمہ کو بہتر رکھنے اور جلد کی تازگی برقرار رکھنے میں معاون ثابت ہوسکتا ہے۔