فنی تربیت مکمل کرنے والے نوجوانوں کو بلاسود قرضے، کاروباری معاونت اور رہنمائی فراہم کی جائے گی،وزیراعلیٰ بلوچستان میر سرفراز بگٹی
کوئٹہ: وزیراعلیٰ بلوچستان میر سرفراز بگٹی نے نوجوانوں کو بااختیار بنانے، روزگار کے مواقع پیدا کرنے اور ریاست و نوجوان نسل کے درمیان فاصلے کم کرنے کے عزم کا اظہار کیا ہے۔ انہوں نے کہا کہ صوبائی حکومت تعلیم، فنی تربیت، میرٹ اور بامقصد مکالمے کے ذریعے نوجوانوں کے لیے ترقی کے نئے راستے کھول رہی ہے۔
وزیراعلیٰ بلوچستان نے ان خیالات کا اظہار وزیراعلیٰ سیکرٹریٹ کوئٹہ میں فنی و پیشہ ورانہ تربیت مکمل کرنے والے نوجوانوں میں اسناد تقسیم کرنے کی تقریب سے خطاب کرتے ہوئے کیا۔ تربیت مکمل کرنے والے نوجوانوں کا تعلق کیچ، گوادر، پنجگور اور خاران سے ہے۔
نوجوانوں کو بلاسود قرضے اور کاروباری معاونت دینے کا اعلان
وزیراعلیٰ بلوچستان میر سرفراز بگٹی نے کہا کہ حکومت کا مقصد صرف نوجوانوں کو تربیت دینا اور اسناد تقسیم کرنا نہیں بلکہ انہیں معاشی طور پر خودمختار بنانا ہے۔ تربیت مکمل کرنے والے نوجوانوں کو کاروبار شروع کرنے اور باعزت روزگار کے حصول کے لیے بلاسود قرضے، کاروباری معاونت اور مسلسل رہنمائی فراہم کی جائے گی۔
انہوں نے کہا کہ حکومت نوجوانوں کو قانونی معیشت کا حصہ بنانے اور ان کے لیے پائیدار معاشی مواقع پیدا کرنے کے لیے عملی اقدامات کررہی ہے۔
چار اضلاع کے نوجوانوں نے فنی تربیت مکمل کرلی
یہ تربیتی پروگرام حکومت بلوچستان کی مالی معاونت سے جاری ریزیلینس، انٹیگریشن اینڈ سوشل اکنامک ایمپاورمنٹ پروگرام کے تحت منعقد کیا گیا۔
تقریب کا اہتمام محکمہ صنعت و تجارت بلوچستان نے بلوچستان رورل سپورٹ پروگرام (بی آر ایس پی) کے اشتراک سے کیا، جس میں صوبائی وزراء، مشیران، پارلیمانی سیکرٹریز، اراکین صوبائی اسمبلی، چیف سیکرٹری بلوچستان شکیل قادر خان اور بی آر ایس پی کے چیف ایگزیکٹو آفیسر طاہر رشید سمیت دیگر حکام نے شرکت کی۔
نوجوانوں اور ریاست کے درمیان اعتماد مضبوط بنانا ترجیح ہے، وزیراعلیٰ
وزیراعلیٰ میر سرفراز بگٹی نے کہا کہ نوجوانوں اور ریاست کے درمیان فاصلے کم کرنا صوبائی حکومت کی اہم ترجیحات میں شامل ہے۔ تعلیم، ہنر، روزگار، میرٹ اور تعمیری مکالمہ نوجوانوں کا ریاست پر اعتماد مضبوط بنانے میں بنیادی کردار ادا کرتے ہیں۔
انہوں نے کہا کہ بلوچستان رورل سپورٹ پروگرام کو منصوبے میں شامل کرنے کا مقصد نوجوانوں سے مؤثر رابطہ، شفاف عمل درآمد اور تربیت کے بعد انہیں معاشی طور پر مستحکم بنانے کے اقدامات کو یقینی بنانا ہے۔
نوجوان خواتین کی خودمختاری پر خصوصی زور
وزیراعلیٰ بلوچستان نے تربیت مکمل کرنے والی خواتین اور طالبات کی حوصلہ افزائی کرتے ہوئے کہا کہ بلوچستان کی نوجوان خواتین میں بے پناہ صلاحیتیں موجود ہیں۔
انہوں نے کہا کہ خواتین کا فنی تربیت کے حصول کے لیے آگے آنا ان کے عزم اور خودمختار مستقبل کی جانب اہم قدم ہے۔ حکومت نوجوان خواتین کو بھی معاشی سرگرمیوں میں مؤثر کردار ادا کرنے اور اپنے لیے باعزت روزگار کے مواقع پیدا کرنے کے لیے معاونت فراہم کرے گی۔
Balochistan CM Sarfraz Bugti Announces Interest-Free Loans, Business Support and Employment Opportunities to Empower Youth.
