والدین، اساتذہ اور اسکول انتظامیہ کی مشترکہ شرکت، اسکول سیلف اسسمنٹ اور ڈویلپمنٹ پلان کے ذریعے تعلیمی معیار اور سہولیات میں بہتری کے لیے عملی اقدامات کا جائزہ
اسکول کی بہتری کے لیے ایک روزہ سیشن
کوئٹہ: گورنمنٹ گرلز ہائی اسکول شیخان میں اسکول کی بہتری اور تعلیمی معیار کو مزید مؤثر بنانے کے لیے ایک روزہ اسکول ڈویلپمنٹ پروگرام سیشن کا انعقاد کیا گیا۔
School development planning brings parents, teachers and management together to improve education quality and school facilities in Quetta.
سیشن میں والدین، اسکول مینجمنٹ کمیٹی، اسکول چیمپئن کلب اور اساتذہ نے مشترکہ طور پر شرکت کی۔ پروگرام کا انعقاد ایجوکیشن سپورٹ پروگرام اور ڈائریکٹوریٹ آف اسکولز کے تعاون سے کیا گیا۔
اسکول سیلف اسسمنٹ اور ڈویلپمنٹ پلان پر بریفنگ
ایک روزہ سیشن کے دوران ایجوکیشن سپورٹ پروگرام کے ہیڈ نقیب اللہ خلجی اور پروونشل فیلڈ آفیسر نور اللہ وطن دوست نے شرکاء کو اسکول سیلف اسسمنٹ اور اسکول ڈویلپمنٹ پلان کے حوالے سے تفصیلی بریفنگ دی۔
شرکاء کو اسکول کی موجودہ صورتحال کا جائزہ لینے، ضروریات کی نشاندہی کرنے اور بہتری کے لیے قابلِ عمل اقدامات تجویز کرنے کے طریقہ کار سے آگاہ کیا گیا۔
مختلف گروپس نے اسکول کا سروے کیا
سیشن کے دوران شرکاء نے اسکول کا سروے کیا اور مختلف گروپس کی صورت میں اسکول کی ضروریات، مسائل اور بہتری کے ممکنہ اقدامات کا جائزہ لیا۔
سروے کے بعد تینوں گروپس نے اپنی تجاویز کی روشنی میں اسکول ڈویلپمنٹ پلان ترتیب دیا، جس میں اسکول کی بہتری کے لیے مختلف ضروری اقدامات کو شامل کیا گیا۔
والدین اور دیگر اسٹیک ہولڈرز کی شمولیت اہم قرار
شرکاء کا کہنا تھا کہ اسٹیک ہولڈرز کی مشاورت سے اسکول ڈویلپمنٹ پلان کی تیاری ایک مثبت اقدام ہے۔
ان کے مطابق اس عمل سے نہ صرف اسکولوں کی تعلیمی صورتحال بہتر بنانے میں مدد ملے گی بلکہ والدین کی شمولیت اور نگرانی کے ذریعے دستیاب فنڈز کے شفاف استعمال کو بھی یقینی بنایا جا سکے گا۔
مشترکہ مشاورت سے قابلِ عمل لائحہ عمل کی تیاری
شرکاء کے مطابق اسکول ڈویلپمنٹ کے عمل میں والدین، اساتذہ اور اسکول انتظامیہ کی مشترکہ شمولیت سے اسکول کی ضروریات کو بہتر انداز میں سمجھنے اور ان کے حل کے لیے واضح اور قابلِ عمل لائحہ عمل تشکیل دینے میں مدد ملے گی۔
ان کا کہنا تھا کہ اسکول کی بہتری کے لیے تمام متعلقہ اسٹیک ہولڈرز کا ایک پلیٹ فارم پر آنا تعلیمی معیار میں بہتری کی جانب اہم قدم ہے۔
تعلیمی معیار کی بہتری کے لیے عملی پیش رفت
گورنمنٹ گرلز ہائی اسکول شیخان میں منعقدہ سیشن کے ذریعے سکول کی موجودہ صورتحال کا جائزہ لینے کے ساتھ مستقبل کی بہتری کے لیے منصوبہ بندی بھی کی گئی۔
والدین، اساتذہ، اسکول مینجمنٹ کمیٹی اور دیگر متعلقہ افراد کی شرکت سے تیار کیا جانے والا اسکول ڈویلپمنٹ پلان تعلیمی ماحول، سہولیات اور انتظامی امور میں بہتری کے لیے ایک واضح سمت فراہم کرنے میں معاون ثابت ہوسکتا ہے۔
