گوادر اور جعفرآباد کے اسکولوں کی بحالی و تعمیر مکمل، تعلیمی سہولیات میں بہتری
بی ایس ڈی آئی کے تحت گوادر میں گرلز مڈل اسکول کی بحالی، جعفرآباد میں بوائز پرائمری اسکول کے نئے کمروں، واش روم اور چار دیواری کی تعمیر مکمل
کوئٹہ: تعلیم کسی بھی معاشرے کے روشن مستقبل کی بنیاد ہوتی ہے، اور جب تعلیمی اداروں میں بہتر سہولیات میسر ہوں تو بچوں کے خوابوں کو آگے بڑھنے کے لیے ایک مضبوط راستہ ملتا ہے۔ بلوچستان میں بھی تعلیمی سہولیات کی بہتری کے لیے حکومتِ بلوچستان کی جانب سے مختلف اقدامات کیے جا رہے ہیں، جس کا مقصد طلبہ و طالبات کو بہتر اور سازگار ماحول میں تعلیم حاصل کرنے کے مواقع فراہم کرنا ہے۔
گوادر میں گرلز مڈل اسکول سینیٹر اسحاق وارڈ کی بحالی مکمل
اسی سلسلے میں بلوچستان اسپیشل ڈویلپمنٹ انیشیٹو، بی ایس ڈی آئی فیز ٹو کے تحت گورنمنٹ گرلز مڈل اسکول سینیٹر اسحاق وارڈ گوادر کی بحالی اور مرمت کا منصوبہ مکمل کرلیا گیا ہے۔
اس منصوبے کے ذریعے اسکول کی عمارت اور بنیادی سہولیات کو بہتر بنایا گیا ہے، جس سے طالبات کو تعلیم کے لیے مزید بہتر، محفوظ اور آرام دہ ماحول میسر آئے گا۔
تعلیمی سہولیات کی بہتری، آنے والی نسلوں کے لیے مضبوط بنیاد
یہ منصوبہ گوادر میں تعلیمی سہولیات کی بہتری کی جانب ایک اہم قدم ہے، جو نہ صرف موجودہ طالبات کے لیے آسانیاں پیدا کرے گا بلکہ آنے والی نسلوں کے لیے بھی بہتر تعلیمی مواقع کی بنیاد مضبوط کرے گا۔
Balochistan improves educational facilities in Gwadar and Jaffarabad through development initiatives to provide students with safer and better learning environments.
جعفرآباد میں گورنمنٹ بوائز پرائمری اسکول میر گل حسن کھوسہ کی تعمیر مکمل
جعفرآباد….جہاں کبھی بوسیدہ دیواروں کے سائے میں بچوں کی تعلیم جاری تھی، آج وہیں ایک محفوظ اور بہتر تعلیمی ماحول ان کے مستقبل کی نئی بنیاد بن رہا ہے۔ جعفرآباد کے علاقے قیدی شاخ میں واقع گورنمنٹ بوائز پرائمری اسکول میر گل حسن کھوسہ میں بلوچستان اسپیشل ڈویلپمنٹ انیشیٹو (بی ایس ڈی آئی) فیز ون کے تحت دو پختہ کمروں، واش روم اور چار دیواری کی تعمیر مکمل کرلی گئی ہے۔
اہلیانِ علاقہ کے مطابق اسکول میں پہلے صرف ایک پرانا اور بوسیدہ کمرہ موجود تھا، جس کے گرنے کا خدشہ بچوں اور اساتذہ کے لیے مسلسل تشویش کا باعث بنا رہتا تھا، تاہم وزیرِ اعلیٰ بلوچستان اور ڈپٹی کمشنر جعفرآباد خالد خان کی خصوصی توجہ سے اسکول کی تعمیر کا عمل مکمل ہوا۔
نئے کمروں سے طلبہ کو بہتر تعلیمی ماحول میسر آگیا
والدین نے ایف سی 114 ونگ کے کمانڈر کرنل طیب رضوان کا شکریہ ادا کرتے ہوئے کہا کہ اسکول کی تعمیر علاقے کے بچوں کے بہتر مستقبل کی جانب ایک اہم قدم ہے۔
طلبہ کا کہنا تھا کہ نئے کمروں کی تعمیر کے بعد انہیں پڑھنے کے لیے پہلے سے کہیں بہتر ماحول میسر آیا ہے۔ مقامی استاد شکیل احمد کے مطابق ماضی میں اسکول کی خستہ حالت کے باعث تدریسی عمل میں مشکلات پیش آتی تھیں۔
اہلیانِ علاقہ کا اسکول کو مڈل کا درجہ دینے کا مطالبہ
اہلیانِ علاقہ نے اسکول کی تعمیر کو خوش آئند قرار دیتے ہوئے مطالبہ کیا کہ بقایا کام مکمل کرنے کے ساتھ میر حسن خان کھوسہ کے اسکول کو مڈل کا درجہ اور بچیوں کے لیے الگ اسکول قائم کیا جائے۔
بلوچستان میں تعلیمی اداروں کی بہتری کا سلسلہ جاری
گوادر اور جعفرآباد میں تعلیمی اداروں کی بحالی، تعمیر اور بنیادی سہولیات کی فراہمی کے یہ منصوبے بلوچستان میں تعلیمی ماحول کو بہتر بنانے کی جانب اہم اقدامات قرار دیے جا رہے ہیں، جن سے طلبہ و طالبات کو محفوظ اور سازگار ماحول میں تعلیم حاصل کرنے کے بہتر مواقع میسر آئیں گے۔
