نادرا نے محفوظ QR کوڈ پر مبنی نیا چِپ لیس قومی شناختی کارڈ متعارف کرا دیا ہے، جو پاکستان میں تیار کیا گیا ہے اور شناخت کی ڈیجیٹل تصدیق کو مزید آسان بنانے کے ساتھ درآمدی چِپ پر انحصار بھی کم کرے گا۔
پاکستان میں تیار کیا گیا نیا شناختی کارڈ
نیشنل ڈیٹا بیس اینڈ رجسٹریشن اتھارٹی (نادرا) کے مطابق نیا شناختی کارڈ پولی کاربونیٹ سے تیار کیا گیا ہے، جسے نادرا کی تکنیکی اور سیکیورٹی ضروریات کے مطابق نیشنل سیکیورٹی پرنٹنگ کمپنی (NSPC)، کراچی نے پاکستان میں تیار کیا ہے۔
نئے کارڈ میں درآمدی مائیکرو چِپ کی جگہ محفوظ QR کوڈ شامل کیا گیا ہے، جس سے بیرونِ ملک سے حاصل کی جانے والی چِپ پر انحصار ختم ہوگا اور شناخت کی ڈیجیٹل تصدیق مزید آسان بنے گی۔
The new QR-based CNIC aims to make digital identity verification faster, simpler and more accessible.
موبائل فون سے QR کوڈ کی تصدیق ممکن
نئے شناختی کارڈ پر موجود QR کوڈ کو PakID موبائل ایپ کے ذریعے اسمارٹ فون پر پڑھا اور تصدیق کیا جا سکے گا۔ QR کوڈ میں کارڈ ہولڈر کی متعلقہ شناختی معلومات اور تصویر موجود ہوگی۔
اس سہولت سے مختلف ادارے نام، پتے اور دیگر ضروری معلومات اپنے کمپیوٹرائزڈ نظام میں زیادہ آسانی اور درستگی کے ساتھ درج کر سکیں گے، جس سے ڈیٹا کے اندراج میں غلطیوں میں بھی کمی آئے گی۔
ٹیلی کام کمپنیوں، بینکوں، ہسپتالوں، پاکستان ریلوے، پولیس اور دیگر مجاز اداروں کو بھی QR کوڈ پڑھنے اور شناخت کی تصدیق کے لیے متعلقہ سافٹ ویئر فراہم کیا جائے گا۔
کارڈ میں خصوصی سیکیورٹی خصوصیات شامل
نئے کارڈ پر خاندان نمبر کے ساتھ معذور افراد، بزرگ شہریوں، اعضاء عطیہ کرنے والے افراد اور آزاد جموں و کشمیر کے شہریوں کے لیے مخصوص نشانات بھی موجود ہوں گے۔
کارڈ ہولڈر کا نام اور پتہ اردو اور انگریزی دونوں زبانوں میں درج ہوگا، جبکہ کارڈ پر نظر آنے والی اور پوشیدہ سیکیورٹی خصوصیات کو بھی جدید تقاضوں کے مطابق بہتر بنایا گیا ہے۔
چِپ والے کارڈ کی جگہ QR کوڈ سسٹم
نادرا کے مطابق چِپ پر مبنی اسمارٹ قومی شناختی کارڈ تقریباً 14 سال قبل متعارف کرایا گیا تھا، تاہم چِپ ریڈرز اور متعلقہ سہولیات کی محدود دستیابی کے باعث اس کی متعدد خصوصیات سے مطلوبہ فائدہ نہیں اٹھایا جا سکا۔
نیا QR کوڈ پر مبنی کارڈ اس مسئلے کو حل کرے گا کیونکہ اس کی تصدیق عام اسمارٹ فون یا کیمرے سے منسلک مناسب سافٹ ویئر کے ذریعے کی جا سکے گی۔
نئے کارڈ کا اجرا شروع
نئے کارڈ کا مرحلہ وار اجرا شروع کر دیا گیا ہے۔ پہلے مرحلے میں 14 اگست 2026 سے چِپ کے بغیر سادہ ٹیسلن میٹریئل والے قومی شناختی کارڈ کی جگہ QR کوڈ والا نیا پولی کاربونیٹ کارڈ جاری کیا جا رہا ہے۔
جنوری 2027 سے تمام اقسام کے قومی شناختی کارڈز، بشمول بیرونِ ملک پاکستانیوں کے قومی شناختی کارڈ (NICOP) اور جووینائل کارڈز کے لیے بھی نیا کارڈ جاری کیا جائے گا۔
آخری مرحلے میں پاکستان اوریجن کارڈ (POC) کو بھی چِپ کے بغیر QR کوڈ پر مبنی نئے کارڈ میں تبدیل کیا جائے گا۔
پرانے شناختی کارڈ بدستور قابلِ استعمال
نادرا کے مطابق پہلے سے جاری کیے گئے تمام اقسام کے شناختی کارڈ اپنی مقررہ مدتِ میعاد تک بدستور کارآمد رہیں گے۔ شہریوں کو صرف نئے کارڈ کے اجرا کی وجہ سے اپنے موجودہ شناختی کارڈ فوری طور پر تبدیل کرانے کی ضرورت نہیں ہوگی۔
