وفاقی حکومت نے AGPR کے تعاون سے ای پنشن پورٹل متعارف کرا دیا، جس کے ذریعے پنشن کیسز کی آن لائن ٹریکنگ، براہِ راست بینک ادائیگی اور بائیومیٹرک تصدیق کی سہولت فراہم کی گئی ہے۔
پنشن کا پورا عمل ڈیجیٹل کردیا گیا
وفاقی حکومت نے اکاؤنٹنٹ جنرل پاکستان ریونیو (AGPR) کے تعاون سے سرکاری ملازمین کے لیے ای پنشن پورٹل لانچ کردیا ہے۔ نئے ڈیجیٹل نظام کا مقصد ریٹائرمنٹ کے بعد پنشن کیسز کی تیاری اور پراسیسنگ کو تیز کرنا اور ملازمین کو بار بار سرکاری دفاتر کے چکر لگانے سے بچانا ہے۔
حکومت کے مطابق نئے نظام کے تحت پنشن کیسز کو روایتی طریقہ کار کے تحت مہینوں کے بجائے دنوں میں مکمل کرنے کی کوشش کی جائے گی، جبکہ ریٹائر ہونے والے ملازمین اپنے کیس کی پیش رفت آن لائن دیکھ سکیں گے۔
پنشن کیس کی آن لائن ٹریکنگ اور SMS الرٹس
نئے نظام میں ریٹائر ہونے والے ملازمین کا ڈیٹا متعلقہ محکمہ ریٹائرمنٹ سے پہلے پورٹل پر اپ لوڈ کرے گا۔ ڈیٹا درج ہونے کے بعد ملازم کو ایک منفرد Pension ID فراہم کی جائے گی، جس کے ذریعے وہ اپنے پنشن کیس کی صورتحال معلوم کرسکے گا۔
پورٹل پر رجسٹرڈ موبائل نمبر پر SMS الرٹس بھی بھیجے جائیں گے، جن کے ذریعے پنشن جاری ہونے یا کسی کٹوتی کی اطلاع دی جاسکے گی۔ رجسٹریشن کے لیے ملازم کا شناختی کارڈ، پرسنل نمبر اور فعال موبائل نمبر درکار ہوگا۔
پنشن براہِ راست بینک اکاؤنٹ میں منتقل ہوگی
ای پنشن نظام کے تحت پنشن کی رقم براہِ راست کمرشل بینک اکاؤنٹس میں منتقل کرنے کی سہولت دی گئی ہے، جس سے پنشنرز کو مخصوص بینک برانچ کے ذریعے رقم وصول کرنے کی پابندی سے نجات ملے گی۔
AGPR کے مطابق وفاقی پنشن کے لیے براہِ راست بینک اکاؤنٹ میں ادائیگی کا نظام پہلے ہی موجود ہے، جبکہ حکومت اب ڈیجیٹل نظام کے ذریعے اس عمل کو مزید آسان اور مؤثر بنانے کی جانب بڑھ رہی ہے۔
Direct bank payments aim to make pension services faster, simpler and more convenient for retirees.
لائف سرٹیفکیٹ کی جگہ بائیومیٹرک تصدیق
نئے نظام میں پنشنرز کی بائیومیٹرک تصدیق کو بھی شامل کیا گیا ہے۔ اس کے تحت پنشنرز کو روایتی Life Certificate جمع کرانے کے بجائے ہر چھ ماہ بعد بینک برانچ یا بائیومیٹرک سہولت رکھنے والے اے ٹی ایم پر فنگر پرنٹ کے ذریعے تصدیق کرانے کی سہولت حاصل ہوگی۔
حکومت مستقبل میں موبائل فون کے ذریعے گھر بیٹھے تصدیق کی سہولت فراہم کرنے پر بھی کام کر رہی ہے۔ اگر مقررہ مدت میں بائیومیٹرک تصدیق مکمل نہ کی جائے تو پنشن اکاؤنٹ عارضی طور پر بلاک ہوسکتا ہے، جسے کامیاب تصدیق کے بعد بحال کیا جاسکے گا۔
وفاقی حکومت کے 4 لاکھ سے زائد پنشنرز
قومی اسمبلی میں پیش کی گئی حالیہ معلومات کے مطابق دسمبر 2025 تک وفاقی حکومت کے 405,119 پنشنرز AGPR اور اس کے ذیلی دفاتر کے ذریعے سول بجٹ سے پنشن وصول کررہے تھے۔
حکومت پہلے ہی ریٹائرمنٹ کے اگلے ماہ سے Anticipatory Pension شروع کرنے کی پالیسی پر بھی عمل کر رہی ہے، جس کا مقصد تنخواہ بند ہونے اور پنشن شروع ہونے کے درمیان مالی خلا کو کم کرنا ہے۔
