یوم دفاع و شہداء پر مسلح افواج، غازیوں اور شہداء کے اہلخانہ کو خراج عقیدت
اسلام آباد: صدر مملکت آصف علی زرداری نے یوم دفاع و شہداء کے موقع پر شہداء، غازیوں اور ان کے اہلخانہ کو خراج عقیدت پیش کرتے ہوئے کہا ہے کہ شہداء کی قربانیاں قوم کی تاریخ میں ہمیشہ یاد رکھی جائیں گی اور آنے والی نسلوں کے لیے مشعل راہ رہیں گی۔
6 ستمبر قومی اتحاد اور عزم کی علامت
صدر زرداری نے کہا کہ 6 ستمبر 1965 پاکستان کی تاریخ کا اہم دن ہے، جب مسلح افواج اور قوم نے اتحاد، عزم اور بہادری کے ساتھ وطن کا دفاع کیا۔ انہوں نے کہا کہ یہ دن ہمیں آزادی، خودمختاری اور قومی سلامتی کے تحفظ کے لیے دی جانے والی قربانیوں کی یاد دلاتا ہے۔
مسلح افواج کی بہادری کو خراج تحسین
صدر مملکت نے کہا کہ 6 ستمبر کا جذبہ آپریشن بنیان مرصوص اور معرکہ حق میں بھی نظر آیا۔ ان کے مطابق مسلح افواج کی پیشہ ورانہ صلاحیت، جرات اور بہادری ملک کے دفاع کے عزم کی عکاس ہے۔
قومی سلامتی پر کوئی سمجھوتہ نہیں ہوگا
آصف علی زرداری نے کہا کہ پاکستان ایک پرامن اور ذمہ دار ریاست کے طور پر مذاکرات، امن اور باہمی احترام کے فروغ کے لیے پرعزم ہے، تاہم ملکی خودمختاری، علاقائی سالمیت اور قومی سلامتی پر کوئی سمجھوتہ نہیں کیا جائے گا۔
انہوں نے کہا کہ مضبوط دفاع کے ساتھ معاشی استحکام، قومی اتحاد، سیاسی برداشت، تعلیم اور ترقی بھی پاکستان کی طاقت کی بنیاد ہیں۔
مضبوط اور ترقی یافتہ پاکستان کے لیے مشترکہ کردار
صدر زرداری نے قوم پر زور دیا کہ وہ مل کر ایک مضبوط، محفوظ، خوشحال اور ترقی یافتہ پاکستان کی تعمیر میں اپنا کردار ادا کرے۔
انہوں نے شہداء کے درجات کی بلندی، ان کے اہلخانہ کے لیے صبر و استقامت اور پاکستان کے امن، استحکام اور خوشحالی کے لیے دعا کی۔
Defence Day 2026: President Asif Ali Zardari pays tribute to Pakistan’s martyrs and armed forces, reaffirming commitment to national sovereignty, security and unity.
