ملک بھر میں پاسپورٹ ڈیلیوری کاؤنٹرز ہر ہفتے کے روز کھولنے کا اعلان

شہری ہفتہ کے روز بھی تیار پاسپورٹس وصول کرسکیں گے، خصوصی سہولت 2 ماہ تک جاری رہے گی، 6 ماہ سے زائد عرصے تک وصول نہ کیے گئے پاسپورٹس پالیسی کے مطابق تلف کیے جائیں گے

ہفتہ کے روز پاسپورٹ ڈیلیوری کاؤنٹرز کھلے رہیں گے

اسلام آباد: ملک بھر میں شہریوں کو تیار پاسپورٹس کی بروقت فراہمی یقینی بنانے کے لیے پاسپورٹ ڈیلیوری کاؤنٹرز ہر ہفتے کے روز بھی کھلے رکھنے کا اعلان کیا گیا ہے۔ 

Pakistan announces Saturday passport delivery services nationwide to facilitate citizens in collecting their ready passports.

صبح 8 بجے سے شام 4 بجے تک سہولت دستیاب

محکمہ پاسپورٹس کے اعلامیے کے مطابق پاسپورٹ ڈیلیوری کاؤنٹرز ہفتے کے روز صبح 8 بجے سے شام 4 بجے تک شہریوں کے لیے کھلے رہیں گے، جہاں تیار پاسپورٹس وصول کیے جاسکیں گے۔ 

خصوصی سہولت 2 ماہ تک جاری رہے گی

اعلامیے کے مطابق ہفتہ وار پاسپورٹ ڈیلیوری کی یہ خصوصی سہولت 2 ماہ تک جاری رہے گی، جس کا مقصد شہریوں کو معمول کے دفتری اوقات کے علاوہ بھی اپنے تیار پاسپورٹس وصول کرنے کا موقع فراہم کرنا ہے۔ 

شہری تیار پاسپورٹس بروقت وصول کریں

حکام نے شہریوں پر زور دیا ہے کہ پاسپورٹ تیار ہونے کے بعد اسے غیر ضروری طور پر زیر التوا نہ رکھیں اور مقررہ اوقات میں اپنا پاسپورٹ وصول کرلیں۔

یہ سہولت بالخصوص ان افراد کے لیے بھی مفید ہوگی جو ملازمت، کاروبار یا دیگر مصروفیات کے باعث ہفتے کے دوران پاسپورٹ دفاتر نہیں پہنچ پاتے۔

6 ماہ سے زائد تاخیر پر پاسپورٹ تلف ہوسکتے ہیں

اعلامیے میں مزید بتایا گیا ہے کہ 6 ماہ سے زائد عرصے تک وصول نہ کیے گئے پاسپورٹس حکومتی پالیسی کے مطابق تلف کردیئے جائیں گے۔

حکام نے شہریوں کو ہدایت کی ہے کہ تیار پاسپورٹس مقررہ مدت کے اندر وصول کرکے غیر ضروری تاخیر سے گریز کریں۔