فائنل میں افغان کلب چمن نے اے کے اسپورٹس کو ایک کے مقابلے میں دو گول سے شکست دے دی، 82 ٹیموں نے ٹورنامنٹ میں حصہ لیا
کوئٹہ: چھٹا آل پاکستان وزیر اعلیٰ بلوچستان فٹبال گولڈ کپ کامیابی کے ساتھ اختتام پذیر ہو گیا۔ اختتامی تقریب میں وزیر اعلیٰ بلوچستان میر سرفراز بگٹی نے خصوصی شرکت کی، جبکہ فائنل میں افغان کلب چمن نے شاندار کھیل کا مظاہرہ کرتے ہوئے اے کے اسپورٹس کو ایک کے مقابلے میں دو گول سے شکست دے کر چیمپئن شپ اپنے نام کر لی۔
افغان کلب چمن نے فائنل جیت لیا
فٹبال گولڈ کپ کا فائنل افغان کلب چمن اور اے کے اسپورٹس کے درمیان کھیلا گیا، جس میں دونوں ٹیموں کے درمیان سنسنی خیز مقابلہ دیکھنے میں آیا۔ افغان کلب چمن نے دو گول اسکور کرکے ٹائٹل اپنے نام کیا، جبکہ اے کے اسپورٹس رنر اَپ رہی۔ مسلم کلب چمن نے ٹورنامنٹ میں تیسری پوزیشن حاصل کی۔
فائنل میچ دیکھنے کے لیے فٹبال شائقین کی بڑی تعداد گراؤنڈ میں موجود تھی، جنہوں نے کھلاڑیوں کی عمدہ کارکردگی اور دلچسپ مقابلے سے بھرپور لطف اٹھایا۔
کھیلوں کے بڑے مقابلوں کا انعقاد جاری رہے گا، وزیر اعلیٰ
اختتامی تقریب سے خطاب کرتے ہوئے وزیر اعلیٰ بلوچستان میر سرفراز بگٹی نے محکمہ کھیل کی کاوشوں کو سراہا اور کامیاب ایونٹ کے انعقاد پر منتظمین کو مبارکباد پیش کی۔ انہوں نے کہا کہ بلوچستان میں کھیلوں کے فروغ اور نوجوانوں کو مثبت سرگرمیوں کے مواقع فراہم کرنے کے لیے مستقبل میں بھی ایسے بڑے مقابلوں کا انعقاد جاری رکھا جائے گا۔
بلوچستان کا پُرامن اور مثبت تشخص دنیا کے سامنے آیا، مینا مجید بلوچ
وزیر اعلیٰ بلوچستان کے ہمراہ صوبائی وزراء، اراکینِ اسمبلی، انسپکٹر جنرل پولیس، صوبائی وزیر داخلہ اور صوبائی مشیر کھیل مینا مجید بلوچ بھی اختتامی تقریب میں موجود تھیں۔
اس موقع پر صوبائی مشیر کھیل مینا مجید بلوچ نے میڈیا سے گفتگو کرتے ہوئے کہا کہ بلوچستان ایک پُرامن صوبہ ہے اور ایسے کھیلوں کے مقابلوں سے دنیا کو صوبے کا مثبت چہرہ دکھانے کا موقع ملتا ہے۔ انہوں نے کہا کہ بلوچستان میں کھیلوں کے میدان آباد ہیں اور اس نوعیت کے ایونٹس صوبے کے مثبت تشخص کو اجاگر کرنے میں اہم کردار ادا کرتے ہیں۔
Afghan Club Chaman Wins 6th All Pakistan CM Balochistan Football Gold Cup 2026, Defeats AK Sports 2–1 in Final
فٹبال گولڈ کپ نے قومی ٹیم کو بین الاقوامی کھلاڑی فراہم کیے، سیکرٹری کھیل
سیکرٹری کھیل درا بلوچ نے میڈیا سے گفتگو کرتے ہوئے کہا کہ وزیر اعلیٰ بلوچستان فٹبال گولڈ کپ پاکستان کے بڑے فٹبال ایونٹس میں شمار ہوتا ہے اور ملک بھر کی ٹیموں پر مشتمل اس نوعیت کے ٹورنامنٹ کا انعقاد ایک بڑی کامیابی ہے۔ انہوں نے کہا کہ اس گولڈ کپ کے ذریعے بلوچستان سے پاکستان فٹبال ٹیم کو سات سے آٹھ بین الاقوامی کھلاڑی میسر آئے ہیں۔
پانچ گراؤنڈز میں 82 ٹیموں کے درمیان مقابلے
چھٹا آل پاکستان وزیر اعلیٰ بلوچستان فٹبال گولڈ کپ 21 ستمبر کو کوئٹہ کے پانچ مختلف گراؤنڈز میں شروع ہوا تھا، جس میں ملک بھر سے 82 ٹیموں نے شرکت کی۔ 9 اکتوبر کو کھیلے گئے فائنل کے ساتھ ٹورنامنٹ اختتام پذیر ہوا، جس میں افغان کلب چمن نے چیمپئن، اے کے اسپورٹس نے رنر اَپ اور مسلم کلب چمن نے تیسری پوزیشن حاصل کی۔
ٹورنامنٹ کا کامیاب انعقاد بلوچستان میں کھیلوں کے فروغ، نوجوان فٹبالرز کی حوصلہ افزائی اور صوبے کے مثبت تشخص کو اجاگر کرنے کی جانب ایک اہم پیش رفت قرار دیا جا رہا ہے۔
