لیبر یونینز کی مشاورت سے حقوق کا تحفظ اور ریلیف کی فراہمی یقینی بنائیں گے،گورنر بلوچستان جعفر خان مندوخیل
کوئٹہ: مزدور ملکی معیشت اور ترقی میں بنیادی کردار ادا کرتے ہیں، ان کے مسائل کا حل حکومت کی ترجیحات میں شامل ہے، گورنر بلوچستان
گورنر بلوچستان جعفر خان مندوخیل نے کہا ہے کہ صوبے بھر کے مزدوروں کو درپیش مسائل اور مشکلات کا حل ترجیحی بنیادوں پر یقینی بنایا جائے گا۔ لیبر یونینز کے رہنماؤں کی مشاورت سے مسائل کی نشاندہی کرکے ان کے حل کیلئے عملی اقدامات کیے جائیں گے، جبکہ عوامی شکایات کے ازالے اور شہریوں کو ریلیف کی فراہمی کیلئے تمام صوبائی وزراء کو مزید فعال کردار ادا کرنے کا پابند بنایا جا رہا ہے۔
مزدوروں کے حقوق کا تحفظ حکومت کی ترجیحات میں شامل ہے
لیبر ونگ کے شرکاء سے خطاب کرتے ہوئے گورنر بلوچستان جعفر خان مندوخیل نے کہا کہ میاں محمد نواز شریف ہمیشہ مزدوروں کی فلاح و بہبود کو خصوصی اہمیت دیتے رہے ہیں۔ مزدور طبقہ ملکی معیشت اور ترقی میں بنیادی کردار ادا کرتا ہے، اس لیے ان کے حقوق کا تحفظ اور مسائل کا حل ناگزیر ہے۔
منتخب نمائندوں کے دفاتر عوام کیلئے کھلے ہیں، گورنر بلوچستان
جعفر خان مندوخیل نے کہا کہ تمام منتخب نمائندوں نے اپنے دفاتر کے دروازے عوام کیلئے کھلے رکھے ہیں تاکہ شہریوں کی شکایات سنی جا سکیں اور ان کے حل کیلئے مؤثر اقدامات کیے جائیں۔ انہوں نے رکن صوبائی اسمبلی زرک خان مندوخیل کے عوامی مسائل کے حل میں کردار کا ذکر کرتے ہوئے کہا کہ حکومت، منتخب نمائندوں اور مزدور تنظیموں کے درمیان مؤثر رابطہ اور تعاون مزدوروں کی فلاح و بہبود میں اہم کردار ادا کرسکتا ہے۔
مزدوروں کا ملکی ترقی میں کلیدی کردار ہے، میر عاصم کرد گیلو
تقریب سے خطاب کرتے ہوئے صوبائی وزیر میر عاصم کرد گیلو نے مسلم لیگ لیبر ونگ کو کامیاب پروگرام کے انعقاد پر مبارکباد دی۔ انہوں نے کہا کہ ملک و قوم کی ترقی میں مزدوروں کا کردار کلیدی حیثیت رکھتا ہے اور ان کی فلاح و بہبود کیلئے مؤثر اقدامات ضروری ہیں۔
مزدوروں کی خوشحالی پاکستان کی خوشحالی ہے، اختر بی بی
رکن قومی اسمبلی اختر بی بی نے کہا کہ مزدوروں کی خوشحالی پاکستان کی خوشحالی کا باعث بنے گی۔ انہوں نے اس ضرورت پر زور دیا کہ کارخانوں سمیت مختلف شعبوں میں کام کرنے والے مزدوروں کی آواز بن کر ان کے مسائل کے حل کیلئے عملی کردار ادا کیا جائے۔
گورنر کی لیبر ونگ تقریب میں شرکت پر اظہارِ تشکر
نسیم الرحمٰن ملاخیل نے گورنر بلوچستان جعفر خان مندوخیل کی مسلم لیگ سے طویل وابستگی کا ذکر کرتے ہوئے چھٹی کے روز لیبر ونگ کی تقریب میں شرکت پر ان کا خصوصی شکریہ ادا کیا۔
مزدوروں کے مسائل کے حل کیلئے کوششیں جاری ہیں، زرک خان مندوخیل
رکن صوبائی اسمبلی زرک خان مندوخیل نے کہا کہ مزدوروں کے حقوق کے تحفظ اور انہیں درپیش مسائل کے حل کیلئے کوششیں جاری ہیں۔ انہوں نے لیبر ونگ کے نمائندوں کو ان کے مسائل کے حل کیلئے اقدامات کی یقین دہانی بھی کرائی۔
مزدوروں کی فلاح و بہبود کیلئے مشترکہ کوششیں ضروری ہیں، عامر خان مندوخیل
عامر خان مندوخیل نے اپنے خطاب میں کہا کہ مزدور ملک و قوم کی ترقی اور خوشحالی میں بنیادی کردار ادا کرتے ہیں، اس لیے ان کے مسائل کے حل اور فلاح و بہبود کیلئے تمام متعلقہ حلقوں کو اپنا کردار ادا کرنا چاہیے۔
مزدوروں کی بہتری کیلئے حکومتی، عوامی اور تنظیمی تعاون پر زور
تقریب میں اس عزم کا اظہار کیا گیا کہ مزدور تنظیموں کی تجاویز اور مشاورت کو مدنظر رکھتے ہوئے مزدوروں کے جائز حقوق کے تحفظ، مسائل کے حل اور بہتر سہولیات کی فراہمی کیلئے مشترکہ کوششیں جاری رکھی جائیں گی.
Governor Balochistan Jaffar Khan Mandokhail Pledges Priority Resolution of Workers’ Issues Through Labour Union Consultation
