ملک بھر میں مفت اسکریننگ، تشخیص اور علاج کی سہولیات فراہم کی جائیں گی، 2030 تک ہیپاٹائٹس سی کو صحت عامہ کے بڑے خطرے سے ختم کرنے کا ہدف
حکومت پاکستان نے ہیپاٹائٹس سی کے خاتمے کے لیے 67 ارب روپے کی لاگت سے وزیراعظم نیشنل پروگرام شروع کردیا ہے، جس کے تحت ملک بھر میں بڑے پیمانے پر اسکریننگ، تشخیص اور مفت علاج کی سہولیات فراہم کی جائیں گی۔
پلاننگ کمیشن کے مطابق پروگرام کا مقصد بیماری کی بروقت نشاندہی، جگر کے سنگین امراض سے بچاؤ اور عوام پر بیماری کے مالی و سماجی بوجھ میں کمی لانا ہے۔ پروگرام کو مرحلہ وار ملک بھر میں وسعت دی جائے گی، جبکہ 2030 تک ہیپاٹائٹس سی کو صحت عامہ کے بڑے خطرے کے طور پر ختم کرنے کے عالمی ہدف کے حصول کے لیے اقدامات کیے جائیں گے۔
16 کروڑ 40 لاکھ سے زائد افراد کی اسکریننگ کا ہدف
عالمی ادارہ صحت کے مطابق قومی پروگرام کے تحت ملک بھر میں 16 کروڑ 40 لاکھ سے زائد افراد کی اسکریننگ کا ہدف مقرر کیا گیا ہے، جبکہ اسلام آباد میں ابتدائی مرحلے کے دوران تقریباً 16 لاکھ افراد تک رسائی کا منصوبہ بنایا گیا ہے۔
پروگرام کے تحت لاکھوں پاکستانیوں کو مفت اسکریننگ، تصدیقی ٹیسٹ اور مؤثر علاج کی سہولت فراہم کی جائے گی۔ اسلام آباد میں اسکریننگ، تشخیص اور علاج کی سہولیات کا آغاز ہوچکا ہے، جبکہ موبائل اسکریننگ کے ذریعے شہریوں تک طبی خدمات کی رسائی بھی بڑھائی جارہی ہے۔
12 سال اور اس سے زائد عمر کے افراد کی مفت اسکریننگ
وفاقی وزیر صحت کے مطابق 12 سال اور اس سے زائد عمر کے افراد کی اسکریننگ قومی پروگرام کا اہم حصہ ہے۔ اسلام آباد میں متعدد سرکاری اسکریننگ مراکز فعال ہیں، جبکہ نجی شعبے کو بھی مفت اسکریننگ کی سہولیات کی فراہمی میں شامل کیا جارہا ہے۔
پلاننگ کمیشن کے مطابق ہیپاٹائٹس سی ایک خاموش بیماری ہے جو طویل عرصے تک بغیر نمایاں علامات کے جسم میں موجود رہ سکتی ہے اور بروقت تشخیص نہ ہونے کی صورت میں جگر کو شدید نقصان پہنچا سکتی ہے۔
محفوظ انجیکشن اور احتیاطی تدابیر پر خصوصی توجہ
حکومت نے بیماری کے پھیلاؤ کی روک تھام کے لیے طبی مراکز میں انفیکشن پریوینشن اور حفظان صحت کے اصولوں پر سختی سے عملدرآمد، محفوظ انجیکشن کے استعمال اور غیر معیاری سرنجوں کی روک تھام پر زور دیا ہے۔
وزیراعظم نے متعلقہ اداروں کو بیماری کی روک تھام، تشخیص اور علاج کے لیے مربوط اقدامات یقینی بنانے کی ہدایت کی ہے۔ پروگرام میں عوامی آگاہی، احتیاطی تدابیر اور صحت کے نظام کو مضبوط بنانے کو بھی خصوصی اہمیت دی گئی ہے۔
وفاقی و صوبائی حکومتوں اور نجی شعبے کے تعاون پر زور
حکومت کے مطابق ہیپاٹائٹس سی کے خاتمے کے لیے وفاقی و صوبائی حکومتوں، صحت کے اداروں، ترقیاتی شراکت داروں، طبی ماہرین، نجی شعبے اور عوام کے درمیان مؤثر تعاون ضروری ہے۔
عالمی ادارہ صحت کے مطابق پاکستان میں ہیپاٹائٹس سی کا بوجھ نمایاں ہے، جبکہ قومی پروگرام پر مؤثر عملدرآمد سے بیماری کے باعث ہونے والی اموات اور نئے انفیکشنز میں کمی لانے میں مدد مل سکتی ہے۔
یہ پروگرام اڑان پاکستان کے صحت، تعلیم، مساوات اور آبادی کے ستون سے بھی ہم آہنگ ہے، جس کا بنیادی مقصد انسانی صحت اور مستقبل کے تحفظ کو قومی ترقی کا اہم حصہ بنانا ہے۔
حکومت نے عوام پر زور دیا ہے کہ وہ ہیپاٹائٹس سی کی بروقت اسکریننگ کروائیں، اپنے خاندان کے افراد کو بھی ٹیسٹ کے لیے راغب کریں اور محفوظ طبی و حفظان صحت کے اصولوں پر عمل کریں۔
Pakistan launches a Rs67 billion Prime Minister’s National Hepatitis C Elimination Programme, targeting free screening, diagnosis and treatment for over 164 million people by 2030.
