نوجوان ملک و قوم کا حقیقی اثاثہ ہیں، انہیں معیاری تعلیم، روزگار اور جدید ڈیجیٹل ہنر فراہم کرنا ہوگا، جعفر خان مندوخیل
جمہوری اداروں کے استحکام پر زور
گورنر بلوچستان جعفر خان مندوخیل نے کہا ہے کہ جمہوریت صرف انتخابی عمل کا نام نہیں بلکہ جمہوری طرز حکمرانی، اجتماعی ذمہ داری اور سب کو ساتھ لے کر چلنے کا سیاسی نظام ہے۔ ملک کی ترقی اور مفاد کیلئے ہر سطح پر حکومتی نظام کو مضبوط بنانے کیلئے عملی اقدامات کیے جا رہے ہیں۔
گورنر بلوچستان نے ان خیالات کا اظہار گورنر ہاؤس کوئٹہ میں صوبائی وزراء میر عاصم کرد گیلو، نور محمد دمکی، رکن صوبائی اسمبلی زرک خان مندوخیل اور پارلیمانی سیکرٹری محمد خان لہڑی سے گفتگو کرتے ہوئے کیا۔
نوجوانوں کو قومی دھارے میں شامل کرنا وقت کی ضرورت
جعفر خان مندوخیل نے کہا کہ موجودہ صورتحال میں نوجوانوں کو قومی دھارے کے قریب لانا انتہائی ضروری ہے۔ نوجوان ملک و قوم کا حقیقی اثاثہ ہیں، اس لیے انہیں معیاری تعلیم، روزگار کے مواقع اور جدید تقاضوں سے ہم آہنگ ڈیجیٹل مہارتیں فراہم کرنا ہوں گی۔
شہریوں کے آئینی حقوق کا تحفظ ضروری
گورنر بلوچستان نے کہا کہ جمہوری اداروں کی بنیادی ذمہ داری عوام کو ان کے حقوق و فرائض سے آگاہ کرنا، سماجی انصاف کو مضبوط بنانا اور شہریوں کے آئینی حقوق و اختیارات کا تحفظ یقینی بنانا ہے۔
عوامی نمائندوں کو قومی یکجہتی کیلئے کردار ادا کرنا ہوگا
انہوں نے کہا کہ نومنتخب عوامی نمائندوں پر سیاسی و سماجی حوالے سے اہم ذمہ داریاں عائد ہوتی ہیں۔ انہیں معاشرے میں تقسیم اور فاصلے پیدا کرنے کے بجائے قومی یکجہتی، باہمی احترام اور سماجی ہم آہنگی کے فروغ کیلئے عملی کردار ادا کرنا ہوگا۔
خاموش اکثریت کی آواز بنیں، گورنر بلوچستان
جعفر خان مندوخیل نے کہا کہ عوامی نمائندوں کو اپنے حلقوں میں خصوصاً ان طبقات کی مؤثر آواز بننا چاہیے جو اپنے حقوق اور مسائل کے حل کیلئے بھرپور انداز میں آواز نہیں اٹھا سکتے۔
معاشی سرگرمیوں کے فروغ پر زور
گورنر بلوچستان کا کہنا تھا کہ حکومت کی معاشی پالیسیوں اور اقدامات کے نتیجے میں ملک معاشی مشکلات پر قابو پانے کی جانب بڑھ رہا ہے۔ اب ضرورت ہے کہ کاروباری، تجارتی اور معاشی سرگرمیوں کو مزید وسعت دی جائے تاکہ معاشی استحکام کو عوامی خوشحالی، روزگار اور معاشی مواقع میں تبدیل کیا جاسکے۔
سیاسی برداشت اور شفافیت جمہوری نظام کی بنیاد
گورنر نے کہا کہ جمہوری نظام کی مضبوطی صرف حکومتی اداروں پر منحصر نہیں بلکہ عوامی نمائندوں کے رویے، سیاسی برداشت، شفافیت اور عوام سے مسلسل رابطے سے بھی وابستہ ہے۔
سیاسی وابستگیوں سے بالاتر ہوکر عوامی خدمت کریں
جعفر خان مندوخیل نے کہا کہ اگر منتخب نمائندے اپنے حلقوں کے مسائل اور اجتماعی مفادات کو ترجیح دیں تو اس سے جمہوری ادارے مزید مضبوط ہوں گے اور عوام کا حکومتی نظام پر اعتماد بڑھے گا۔
انہوں نے کہا کہ وقت کا تقاضا ہے کہ سیاسی وابستگیوں سے بالاتر ہوکر عوامی فلاح، آئین کی بالادستی، قانون کی حکمرانی اور معاشرتی ہم آہنگی کیلئے کردار ادا کیا جائے۔
Balochistan Governor Jaffar Khan Mandokhail stresses democratic governance, youth empowerment, digital skills, employment opportunities and public welfare.
