وزیراعلیٰ میر سرفراز بگٹی کی ہدایت پر صوبائی وزیر صحت بخت محمد کاکڑ اور معاون برائے محکمہ داخلہ بابر یوسفزئی نجی اسپتال پہنچ گئے، زخمی طالبات کو بہترین طبی سہولیات کی فراہمی اور علاج کے تمام اخراجات حکومت کی جانب سے برداشت کرنے کی یقین دہانی
وزیراعلیٰ بلوچستان میر سرفراز بگٹی کی خصوصی ہدایت پر صوبائی وزیر صحت بخت محمد کاکڑ اور معاون برائے محکمہ داخلہ بابر یوسفزئی نوشکی گرلز ڈگری کالج میں فائرنگ کے واقعے میں زخمی ہونے والی طالبات کی عیادت کے لیے کوئٹہ کے ایک نجی اسپتال پہنچ گئے، جہاں انہوں نے طالبات کی خیریت دریافت کی اور انہیں فراہم کی جانے والی طبی سہولیات کے بارے میں معلومات حاصل کیں۔
اس موقع پر صوبائی وزیر صحت بخت محمد کاکڑ نے کہا کہ زخمی طالبات کو بہترین طبی سہولیات فراہم کی جا رہی ہیں، جبکہ ان کے علاج معالجے کے تمام اخراجات صوبائی حکومت برداشت کرے گی۔ انہوں نے کہا کہ حکومت زخمی طالبات کی صحت یابی کے لیے ہر ممکن اقدامات یقینی بنائے گی۔
زخمی طالبات کی بہادری قابلِ تحسین ہے، بخت محمد کاکڑ
صوبائی وزیر صحت بخت محمد کاکڑ نے کہا کہ زخمی طالبات نے مشکل حالات میں جرأت اور بہادری کا مظاہرہ کیا۔ ان کا کہنا تھا کہ تعلیمی اداروں کو نشانہ بنا کر دشمن ہمارے حوصلے پست نہیں کر سکتا اور بلوچستان کے عوام تعلیم کے فروغ کے لیے اپنی جدوجہد جاری رکھیں گے۔
انہوں نے زخمی طالبات کو فراہم کی جانے والی طبی سہولیات پر توجہ دیتے ہوئے کہا کہ حکومت کی اولین ترجیح متاثرہ طالبات کو بہتر علاج معالجہ فراہم کرنا اور ان کی جلد صحت یابی کو یقینی بنانا ہے۔
حملے میں ملوث عناصر اپنے مقاصد میں کامیاب نہیں ہوں گے، بابر یوسفزئی
معاون برائے محکمہ داخلہ بابر یوسفزئی نے کہا کہ نوشکی گرلز ڈگری کالج میں ہونے والے حملے میں فتنۃ الہندوستان کے سہولت کار ملوث ہیں۔ انہوں نے کہا کہ ایسے عناصر اپنے مذموم مقاصد میں کبھی کامیاب نہیں ہوں گے۔
بابر یوسفزئی کے مطابق وزیراعلیٰ بلوچستان کی خصوصی ہدایت پر وہ زخمی طالبات کی عیادت کے لیے اسپتال پہنچے اور انہیں حکومت کی جانب سے ہر ممکن تعاون کی یقین دہانی کرائی۔
زخمی طالبات کو ہر ممکن تعاون فراہم کرنے کا عزم
صوبائی وزیر صحت بخت محمد کاکڑ اور معاون برائے محکمہ داخلہ بابر یوسفزئی نے زخمی طالبات کی خیریت دریافت کرتے ہوئے ان کی جلد صحت یابی کے لیے نیک خواہشات کا اظہار کیا۔ حکومتی نمائندوں نے اس عزم کا اظہار کیا کہ متاثرہ طالبات کے علاج معالجے اور ضروری طبی سہولیات کی فراہمی میں کوئی کمی نہیں آنے دی جائے گی۔
Balochistan Health Minister Visits Nushki Firing Victims, Government to Cover Injured Students’ Medical Expenses
