بلوچستان فوڈ اتھارٹی نے کوئٹہ کے نواحی علاقے کچلاک میں کارروائی کرتے ہوئے غیر قانونی طور پر مشروبات تیار کرنے والے غیر رجسٹرڈ پروڈکشن یونٹ کو سیل کر دیا، جبکہ بڑی مقدار میں غیر معیاری شربت، سرکہ اور جوس برآمد کر کے قبضے میں لے لیے گئے۔
غیر رجسٹرڈ پروڈکشن یونٹ کے خلاف کارروائی
روزمرہ استعمال ہونے والے شربت، جوس اور سرکہ اگر غیر معیاری اور مضرِ صحت ہوں تو یہ انسانی صحت کے لیے سنگین خطرات کا باعث بن سکتے ہیں۔ ایسے ہی خدشات کے پیشِ نظر بلوچستان فوڈ اتھارٹی نے کوئٹہ کے نواحی علاقے کچلاک میں ایک بڑی کارروائی کرتے ہوئے غیر قانونی طور پر مشروبات تیار کرنے والے یونٹ کو بے نقاب کر دیا۔
خفیہ اطلاع پر ڈائریکٹر آپریشنز بلوچستان فوڈ اتھارٹی فخرالدین مری کی سربراہی میں فوڈ سیفٹی ٹیموں نے کارروائی کرتے ہوئے غیر رجسٹرڈ پروڈکشن یونٹ کو سیل کر دیا۔ کارروائی کے دوران بڑی مقدار میں غیر معیاری شربت، سرکہ اور جوس برآمد کر کے قبضے میں لے لیا گیا، جبکہ یونٹ میں جاری پیداوار فوری طور پر روک دی گئی۔
گمراہ کن لیبلنگ اور جعلی معلومات کا انکشاف
حکام کے مطابق ابتدائی تحقیقات میں مصنوعات پر گمراہ کن لیبلنگ، جعلی معلومات اور غلط پتے کے استعمال کا بھی انکشاف ہوا ہے، جس سے صارفین کو دھوکا دینے کی کوشش کی جا رہی تھی۔
بلوچستان فوڈ اتھارٹی نے تیار شدہ مشروبات کے نمونے لیبارٹری تجزیے کے لیے بھجوا دیے ہیں۔ حکام کا کہنا ہے کہ لیبارٹری رپورٹ موصول ہونے کے بعد ذمہ داران کے خلاف قانون کے مطابق مزید کارروائی عمل میں لائی جائے گی۔
غیر معیاری خوراک کے خلاف کریک ڈاؤن جاری
ڈائریکٹر آپریشنز فخرالدین مری کا کہنا ہے کہ عوام کی صحت سے کھیلنے والوں کے خلاف بلاامتیاز کارروائیاں جاری رہیں گی، جبکہ صوبے بھر میں غیر معیاری خوراک اور مشروبات کے خلاف کریک ڈاؤن مزید مؤثر بنایا جا رہا ہے تاکہ شہریوں کو محفوظ اور معیاری غذائی اشیاء کی فراہمی یقینی بنائی جا سکے۔
دوسری جانب شہریوں نے بلوچستان فوڈ اتھارٹی کی کارروائی کو خوش آئند قرار دیتے ہوئے مطالبہ کیا کہ ایسے غیر قانونی یونٹس کے خلاف کارروائیاں صرف وقتی نہیں بلکہ مستقل بنیادوں پر جاری رہنی چاہئیں، تاکہ مضرِ صحت خوراک اور مشروبات کی تیاری اور فروخت کا مکمل خاتمہ ممکن بنایا جا سکے۔
