ای سم (eSIM) کیا ہے اور کیسے کام کرتی ہے؟ پی ٹی اے نے نئے چارجز بھی مقرر کردیئے

ای سم (eSIM) موبائل فون میں نصب ایک ڈیجیٹل سم ٹیکنالوجی ہے جو فزیکل سم کارڈ کے بغیر موبائل نیٹ ورک سے منسلک ہونے کی سہولت فراہم کرتی ہے، جبکہ پاکستان ٹیلی کمیونیکیشن اتھارٹی (PTA) نے ای سم (eSIM) کے اجرا اور منتقلی کے حوالے سے نئے چارجز بھی مقرر کردیئے ہیں۔

ای سم (eSIM) کیا ہے؟

ای سم (eSIM) کا مطلب ایمبیڈڈ سم ہے، جو عام پلاسٹک سم کارڈ کے برعکس موبائل فون کے اندر پہلے سے نصب ایک چھوٹی چِپ ہوتی ہے۔ اسے فون سے نکالا یا تبدیل نہیں کیا جاسکتا۔

ای سم (eSIM) میں موبائل نیٹ ورک کا ڈیجیٹل پروفائل محفوظ کیا جاتا ہے۔ صارف عام طور پر نیٹ ورک فراہم کرنے والی کمپنی کی جانب سے دیے گئے کیو آر کوڈ (QR Code) کو اسکین کرکے اپنے موبائل فون میں ای سم (eSIM) پروفائل انسٹال کرتا ہے۔

اس طرح موبائل نیٹ ورک استعمال کرنے کے لیے فزیکل سم کارڈ ڈالنے کی ضرورت نہیں رہتی۔

ای سم (eSIM) ٹیکنالوجی صارفین کو روایتی فزیکل سم کا آسان اور جدید متبادل فراہم کرتی ہے۔

ای سم (eSIM) کیسے کام کرتی ہے؟

ای سم (eSIM) موبائل فون میں موجود مخصوص چِپ کے ذریعے کام کرتی ہے۔ جب صارف کسی نیٹ ورک کی ای سم (eSIM) حاصل کرتا ہے تو اسے ایک ڈیجیٹل پروفائل فراہم کیا جاتا ہے، جو عموماً کیو آر کوڈ (QR Code) کے ذریعے فون میں انسٹال کیا جاتا ہے۔

پروفائل انسٹال ہونے کے بعد موبائل فون نیٹ ورک سے منسلک ہوجاتا ہے اور صارف فون کی سیٹنگز کے ذریعے دستیاب ای سم (eSIM) پروفائلز میں سے مختلف نمبرز یا نیٹ ورکس کا انتخاب کرسکتا ہے۔

تاہم ای سم (eSIM) کو ایک نئے فون میں منتقل کرنا عام سم کارڈ نکال کر دوسرے فون میں لگانے جتنا آسان نہیں ہوتا، بلکہ اس کے لیے نیٹ ورک فراہم کنندہ سے ڈیجیٹل منتقلی یا دوبارہ اجرا کی ضرورت ہوسکتی ہے۔

پاکستان میں ای سم (eSIM) دستیاب ہے

پاکستان میں ای سم (eSIM) ٹیکنالوجی دستیاب ہے اور بڑے موبائل نیٹ ورک آپریٹرز ای سم (eSIM) کی سہولت فراہم کرتے ہیں۔ ان میں جاز، زونگ، یوفون، ٹیلی نار اور اونک شامل ہیں۔

ای سم (eSIM) استعمال کرنے کے لیے ضروری ہے کہ موبائل فون میں اس ٹیکنالوجی کی سپورٹ موجود ہو۔ جدید اور کئی فلیگ شپ و مڈ رینج اسمارٹ فونز میں ای سم (eSIM) کی سہولت دستیاب ہے۔

ای سم (eSIM) کے اہم فوائد کیا ہیں؟

ای سم (eSIM) کا سب سے بڑا فائدہ یہ ہے کہ صارف کو سم کارڈ لگانے یا نکالنے کی ضرورت نہیں ہوتی۔ اس کے ذریعے ایک ہی فون میں متعدد نیٹ ورک پروفائلز رکھنا اور بعض ڈیوائسز میں ایک ساتھ دو نمبرز استعمال کرنا ممکن ہوتا ہے۔

ای سم (eSIM) کے دیگر فوائد میں سم کارڈ کے گم یا خراب ہونے کا خطرہ کم ہونا، نیٹ ورک تبدیل کرنے میں آسانی اور بیرون ملک سفر کے دوران مقامی یا ٹریول ای سم (eSIM) استعمال کرنے کی سہولت شامل ہے۔

چونکہ ای سم (eSIM) فون کے اندر نصب ہوتی ہے، اس لیے چوری کی صورت میں اسے آسانی سے نکال کر پھینکا نہیں جاسکتا، جو ڈیوائس کی ٹریکنگ اور موبائل کنکشن برقرار رکھنے میں مددگار ثابت ہوسکتا ہے۔

پی ٹی اے (PTA) نے ای سم (eSIM) کے نئے چارجز مقرر کردیئے

پاکستان ٹیلی کمیونیکیشن اتھارٹی (PTA) نے ای سم (eSIM) کے اجرا اور فزیکل سم کو ای سم (eSIM) میں تبدیل کرنے کے چارجز کے حوالے سے نئی حد مقرر کردی ہے۔

پی ٹی اے (PTA) کے مطابق سیلولر موبائل آپریٹرز کی جانب سے ای سم (eSIM) کے اجرا اور فزیکل سم کو ای سم (eSIM) میں تبدیل کرنے کے لیے زیادہ سے زیادہ ریٹیل قیمت 1500 روپے ہوگی۔

یہ فیس پاکستان کے علاوہ آزاد جموں و کشمیر اور گلگت بلتستان میں بھی لاگو ہوگی۔

ای سم (eSIM) ایک فون سے دوسرے فون میں منتقل کرنا مفت ہوگا

پی ٹی اے (PTA) کے نئے فیصلے کے مطابق ای سم (eSIM) پروفائل کو ایک موبائل ڈیوائس سے دوسری ڈیوائس پر منتقل کرنے کی 10 مرتبہ تک کوئی فیس وصول نہیں کی جائے گی۔

پی ٹی اے (PTA) کے مطابق کم کیے گئے چارجز اور ای سم (eSIM) کی مفت منتقلی سے متعلق یہ سہولت 17 اگست 2026 سے نافذ العمل ہوگی۔