کوئٹہ میں 9 ہزار 240 جبکہ اسلام آباد میں 720 امیدواروں نے میڈیکل و ڈینٹل کالجز میں داخلوں کا امتحان دیا
دو شہروں میں امتحانی مراکز قائم
کوئٹہ: بلوچستان میں میڈیکل اور ڈینٹل کالجز میں داخلوں کے لیے MDCAT 2026 کا امتحان مقررہ تاریخ، وقت اور ضوابط کے مطابق پُرامن ماحول میں منعقد ہوا۔
بلوچستان میں امتحان کا انعقاد بولان یونیورسٹی آف میڈیکل اینڈ ہیلتھ سائنسز (BUMHS)، کوئٹہ کی زیر نگرانی کیا گیا۔ صوبے کے امیدواروں کے لیے کوئٹہ اور اسلام آباد میں امتحانی مراکز قائم کیے گئے تھے۔
تقریباً 10 ہزار امیدواروں کی شرکت
حکام کے مطابق کوئٹہ کے امتحانی مرکز میں تقریباً 9 ہزار 240 جبکہ اسلام آباد مرکز میں تقریباً 720 مرد و خواتین امیدواروں نے امتحان میں شرکت کی۔
انتظامات کا جائزہ
امتحانی عمل کے دوران صوبائی وزیر تعلیم راحیلہ حمید خان درانی، وائس چانسلر BUMHS پروفیسر ڈاکٹر شبیر احمد لہڑی، وائس چانسلر BUITEMS پروفیسر خالد حفیظ اور دیگر متعلقہ حکام نے مختلف امتحانی مراکز کا دورہ کیا۔
حکام نے امتحانی مراکز میں سیکیورٹی، نظم و ضبط، امیدواروں کے لیے سہولیات اور دیگر انتظامات کا جائزہ لیا اور مجموعی انتظامات پر اطمینان کا اظہار کیا۔
امتحان بغیر کسی بڑے ناخوشگوار واقعے کے مکمل
BUMHS انتظامیہ کے مطابق امتحان مقررہ وقت پر شروع ہوا اور مجموعی طور پر پُرامن، شفاف اور خوش اسلوبی سے مکمل ہوا۔ امتحانی عمل کے دوران کسی بڑے ناخوشگوار واقعے یا انتظامی رکاوٹ کی اطلاع نہیں ملی۔
یونیورسٹی انتظامیہ نے امتحان کے کامیاب انعقاد میں تعاون کرنے پر صوبائی حکومت، محکمہ تعلیم، ضلعی انتظامیہ، سیکیورٹی اداروں، BUITEMS انتظامیہ، امتحانی عملے اور دیگر متعلقہ اداروں کا شکریہ ادا کیا۔
MDCAT 2026 Successfully Conducted in Balochistan with Nearly 10,000 Candidates Appearing in Quetta and Islamabad
