بلوچستان میں ترقی کا نیا سفر، بی ایس ڈی آئی کے تحت اہم منصوبے مکمل

بنیادی سہولیات سے لے کر ڈیجیٹل مہارتوں تک، بی ایس ڈی آئی کے تحت مختلف اضلاع میں عوامی فلاح کے منصوبے مکمل

کوئٹہ:بلوچستان اسپیشل ڈویلپمنٹ انیشی ایٹو، بی ایس ڈی آئی کے تحت صوبے کے مختلف اضلاع میں عوامی ضروریات کو مدنظر رکھتے ہوئے ترقیاتی منصوبوں پر عملدرآمد جاری ہے۔ آواران، گوادر اور کوہلو میں مکمل کیے گئے منصوبوں سے بنیادی سہولیات، سرکاری خدمات اور نوجوانوں کے لیے جدید مواقع میں بہتری لانے کی کوشش کی گئی ہے۔

آواران میں چیدگی واٹر سپلائی اسکیم مکمل

آواران کے دور دراز علاقے چیدگی میں 5.10 ملین روپے کی لاگت سے واٹر سپلائی اسکیم مکمل کرلی گئی ہے۔

بی ایس ڈی آئی فیز ون کے تحت مکمل ہونے والے منصوبے میں پانی کی فراہمی کے نظام کو بہتر بنانے کے ساتھ سولر سسٹم بھی نصب کیا گیا ہے، جس سے پانی کی فراہمی کا عمل زیادہ قابلِ اعتماد بنانے میں مدد ملے گی۔

گوادر میں 11 غیر فعال سرکاری دفاتر بحال

گوادر میں سرکاری امور کی مؤثر انجام دہی اور شہریوں کو مقامی سطح پر مختلف محکموں کی خدمات فراہم کرنے کے لیے 11 غیر فعال سرکاری دفاتر کو دوبارہ فعال کردیا گیا ہے۔

بی ایس ڈی آئی کے تحت اس منصوبے پر 14 ملین روپے لاگت آئی ہے۔

بحال کیے گئے دفاتر میں سائنس اینڈ انفارمیشن ٹیکنالوجی، اسپورٹس اینڈ یوتھ افیئرز، انڈسٹریز، لیبر، ویمن ڈویلپمنٹ اور لائیو اسٹاک اینڈ ڈیری ڈویلپمنٹ سمیت مختلف محکمے شامل ہیں۔

کوہلو میں آئی ٹی حب، نوجوانوں کے لیے جدید مواقع

کوہلو میں بی ایس ڈی آئی کے تحت تعمیر کیے گئے آئی ٹی حب کا مقصد نوجوانوں کو جدید ٹیکنالوجی، تعلیم، فری لانسنگ اور ڈیجیٹل مہارتوں کے مواقع فراہم کرنا ہے۔

ڈپٹی کمشنر کوہلو عظیم جان دومڑ نے آئی ٹی حب کا دورہ کیا، نوجوانوں سے ملاقات کی اور مختلف سرگرمیوں کا جائزہ لیا۔

نوجوانوں سے گفتگو کرتے ہوئے ڈپٹی کمشنر نے کہا کہ موجودہ دور میں انفارمیشن ٹیکنالوجی، فری لانسنگ اور ڈیجیٹل مہارتیں روزگار کے نئے مواقع پیدا کررہی ہیں، اس لیے نوجوان تعلیم کے ساتھ جدید ہنر سیکھنے پر بھی توجہ دیں۔

کوہلو میں 144 غیر فعال سرکاری اسکول بھی بحال

ڈپٹی کمشنر کوہلو کے مطابق ضلع میں بی ایس ڈی آئی کے تحت مختلف ترقیاتی منصوبوں پر کام جاری ہے، جبکہ 144 غیر فعال سرکاری اسکولوں کو بھی دوبارہ فعال کیا گیا ہے۔

ضلعی انتظامیہ کے مطابق نوجوانوں کے لیے سازگار ماحول پیدا کرنے اور عوامی سہولیات میں بہتری کے لیے اقدامات کا سلسلہ جاری رکھا جائے گا۔

بی ایس ڈی آئی کا بنیادی مقصد عوامی سہولیات میں بہتری

آواران میں پانی کی فراہمی، گوادر میں سرکاری دفاتر کی بحالی اور کوہلو میں آئی ٹی و تعلیمی مواقع کے منصوبے اس امر کی عکاسی کرتے ہیں کہ بی ایس ڈی آئی کے تحت مختلف اضلاع میں بنیادی سہولیات، سرکاری خدمات، تعلیم اور ڈیجیٹل مہارتوں کے شعبوں پر توجہ دی جارہی ہے۔

BSDI Development Projects: Water Supply in Awaran, 11 Government Offices Revived in Gwadar and IT Hub Empowering Youth in Kohlu