بلوچستان کے مختلف اضلاع میں بنیادی سہولیات کی بہتری کے لیے بی ایس ڈی آئی کے منصوبے

بی ایس ڈی آئی فیز ٹو کے تحت قلعہ عبداللہ میں واٹر سپلائی اسکیم مکمل جبکہ گوادر میں ڈی ایچ کیو اسپتال اور سرکاری رہائشی کوارٹرز کی بہتری کا منصوبہ شامل کیا گیا ہے۔

قلعہ عبداللہ میں واٹر سپلائی اسکیم مکمل

بلوچستان اسپیشل ڈویلپمنٹ انیشیٹو (بی ایس ڈی آئی) کے تحت حکومتِ بلوچستان پسماندہ اور دور دراز علاقوں میں بنیادی سہولیات کی فراہمی بہتر بنانے کے لیے مختلف ترقیاتی منصوبے مکمل کر رہی ہے۔

اسی سلسلے میں بی ایس ڈی آئی فیز ٹو کے تحت کلی سیدان سمد آغا، ضلع قلعہ عبداللہ میں واٹر سپلائی اسکیم مکمل کرلی گئی ہے۔

منصوبے سے قبل علاقے کے مکینوں کو پانی کے حصول میں مشکلات کا سامنا تھا اور صاف پانی کی محدود دستیابی کے باعث لوگوں کو روزمرہ ضروریات کے لیے دور دراز علاقوں کا رخ کرنا پڑتا تھا۔

واٹر سپلائی اسکیم کی تکمیل سے مقامی آبادی کو پانی تک بہتر اور آسان رسائی حاصل ہوگی، جبکہ لوگوں کا وقت اور محنت بھی بچے گی۔

گوادر میں ڈی ایچ کیو اسپتال کی بہتری کا منصوبہ

بی ایس ڈی آئی فیز ٹو کے تحت گوادر میں ڈی ایچ کیو اسپتال کی طبی سہولیات بہتر بنانے کے ساتھ سرکاری رہائشی کوارٹرز کی مرمت و بحالی بھی کی جائے گی۔

ڈی ایچ کیو اسپتال میں بعض سہولیات اور عمارت کے مختلف حصوں کو بہتری کی ضرورت ہے، جس کے باعث مریضوں اور طبی عملے کو مشکلات کا سامنا رہتا ہے۔

انجینئر بی ایس ڈی آئی محمد عالم نے دیگر حکام کے ہمراہ منصوبے کی سائٹ کا دورہ کیا اور صورتحال کا جائزہ لیا۔

صحت اور رہائش کی سہولیات میں بہتری متوقع

منصوبے کی تکمیل سے ڈی ایچ کیو اسپتال کے ماحول اور طبی سہولیات میں بہتری آئے گی، جس سے مریضوں کو بہتر طبی ماحول میسر ہوگا۔

سرکاری رہائشی کوارٹرز کی مرمت اور بحالی کے بعد انہیں بھی قابلِ استعمال حالت میں لایا جا سکے گا، جبکہ دونوں منصوبوں سے مقامی آبادی اور سرکاری اداروں کو بنیادی سہولیات کی فراہمی میں بہتری آئے گی۔