جشن آزادی سپورٹس فیسٹیول: کوئٹہ میں فٹبال اور بیڈمنٹن کے مقابلے جاری

محکمہ کھیل حکومت بلوچستان کی جانب سے جشن آزادی کو شایانِ شان انداز میں منانے کے لیے صوبے بھر میں سپورٹس مقابلے جاری ہیں، کوئٹہ میں فٹبال اور بیڈمنٹن کے مقابلوں میں کھلاڑی بھرپور جوش و جذبے کے ساتھ حصہ لے رہے ہیں۔

ایوب اسٹیڈیم میں فٹبال مقابلے کوارٹر فائنل مرحلے میں داخل

کوئٹہ کے ایوب اسٹیڈیم میں فٹبال کے مقابلے کوارٹر فائنل مرحلے میں داخل ہو گئے ہیں۔

گزشتہ روز کھیلے گئے پہلے میچ میں ہزارہ کلب نے شاندار کھیل کا مظاہرہ کرتے ہوئے ہدہ محمڈن کو صفر کے مقابلے میں دو گول سے شکست دے دی۔

دوسرا مقابلہ ینگ خروٹ آباد اور ستارہ بلوچستان فٹبال کلب کے درمیان کھیلا گیا۔ مقررہ وقت تک دونوں ٹیمیں بھرپور کوشش کے باوجود کوئی گول نہ کر سکیں اور میچ بغیر کسی گول کے برابر رہا۔ میچ کا فیصلہ پینلٹی ککس پر ہوا، جس میں ستارہ بلوچستان نے ایک گول کی برتری حاصل کرتے ہوئے کامیابی اپنے نام کر لی۔

دوسری جانب قیوم چنگیزی فٹبال گراؤنڈ میں کھیلے گئے میچ میں نمسو ہزارہ نے شہید عثمان یونائیٹڈ کو شکست دے دی۔

ایوب اسٹیڈیم میں بیڈمنٹن کے مقابلے بھی جاری

جشن آزادی کے سلسلے میں محکمہ کھیل حکومت بلوچستان کی جانب سے بیڈمنٹن کے مقابلوں کا بھی انعقاد کیا گیا ہے، جو ایوب اسٹیڈیم میں دو روز تک جاری رہیں گے۔

جشن آزادی سپورٹس فیسٹیول کے بیڈمنٹن مقابلوں میں 72 جوڑیوں پر مشتمل 144 کھلاڑی حصہ لے رہے ہیں۔ بیڈمنٹن ٹورنامنٹ ڈبلز فارمیٹ پر مشتمل ہے، جس میں کھلاڑی ٹائٹل اپنے نام کرنے کے لیے بھرپور محنت اور جوش و جذبے کا مظاہرہ کر رہے ہیں۔

Independence Day sports events are engaging Balochistan’s youth in healthy activities.

کھیلوں کے مقابلے نوجوانوں کو صحت مند سرگرمیوں کی جانب راغب کرنے کا ذریعہ

کھلاڑیوں کا کہنا ہے کہ جشن آزادی کے موقع پر اس طرح کے کھیلوں کے مقابلوں کا انعقاد نہ صرف کھلاڑیوں کی حوصلہ افزائی کرتا ہے بلکہ نوجوانوں کو صحت مند سرگرمیوں کی جانب راغب کرنے میں بھی اہم کردار ادا کرتا ہے۔

بیڈمنٹن کے مقابلے مگسی ہال میں دو روز تک جاری رہیں گے، جہاں کوئٹہ بھر سے کھلاڑی حصہ لے رہے ہیں اور کھیل کے ذریعے جشن آزادی منا رہے ہیں۔

جشن آزادی سپورٹس فیسٹیول کے شاندار مقابلے اس وقت پورے بلوچستان میں کامیابی کے ساتھ جاری ہیں، جن میں کھلاڑی بھرپور جوش و جذبے کے ساتھ حصہ لے رہے ہیں۔