اقوام متحدہ کے سیکریٹری جنرل کو بین الاقوامی خدمات، سفارت کاری اور تنازعات کے پُرامن حل کے لیے خدمات کے اعتراف میں اعلیٰ سول اعزاز دیا گیا
اسلام آباد: صدرِ مملکت آصف علی زرداری نے اقوام متحدہ کے سیکریٹری جنرل انتونیو گوتریس کو نشانِ امتیاز سے نواز دیا۔ اس سلسلے میں ایوانِ صدر میں خصوصی تقریب کا انعقاد کیا گیا، جس میں وزیراعظم شہباز شریف، نائب وزیراعظم و وزیر خارجہ اسحاق ڈار، اسپیکر قومی اسمبلی سردار ایاز صادق اور غیر ملکی سفیروں سمیت دیگر اہم شخصیات نے شرکت کی۔
پاکستان کے مخلص دوست کے اعزاز میں تقریب
انتونیو گوتریس کو پاکستان کے مخلص دوست اور بین الاقوامی سطح پر خدمات انجام دینے والی اہم شخصیت کی حیثیت سے نشانِ امتیاز سے نوازا گیا۔
وزیراعظم شہباز شریف نے بھی اقوام متحدہ کے سیکریٹری جنرل کو اعلیٰ سول اعزاز ملنے پر مبارکباد دی اور ان کی عالمی سطح پر امن، سفارت کاری اور انسانی خدمت کے لیے کاوشوں کو سراہا۔
سفارت کاری اور امن کے لیے خدمات کا اعتراف
انتونیو گوتریس کو نشانِ امتیاز دینے کا فیصلہ ان کی بین الاقوامی خدمات، سفارت کاری، تنازعات کے پُرامن حل اور عالمی امن کے لیے کوششوں کے اعتراف میں کیا گیا ہے۔
پاکستانی عوام کی مہمان نوازی کو سراہا
اعزاز ملنے کے بعد گفتگو کرتے ہوئے انتونیو گوتریس نے حکومتِ پاکستان کا شکریہ ادا کرتے ہوئے کہا کہ وہ اس اعلیٰ اعزاز پر دل کی گہرائیوں سے ممنون ہیں۔
انہوں نے کہا کہ وہ پاکستانی عوام کی مہمان نوازی اور فراخ دلی کے عینی شاہد ہیں اور اس اعزاز کو اقوام متحدہ میں کام کرنے والے تمام افراد کی جانب سے بھی قبول کرتے ہیں۔
سیلاب اور موسمیاتی بحران میں پاکستانی عوام کی مشکلات کا ذکر
اقوام متحدہ کے سیکریٹری جنرل نے کہا کہ انہوں نے پاکستان میں سیلاب اور موسمیاتی بحران کے باعث عوام کو درپیش مشکلات کو محسوس کیا ہے۔
انہوں نے دہشت گردی کے خلاف پاکستانی قوم کے عزم، یکجہتی اور استقامت کو بھی سراہتے ہوئے کہا کہ اقوام متحدہ کے امن مشنز میں خدمات انجام دینے والے پاکستانی دستے اس عظیم قوم کی حقیقی تصویر پیش کرتے ہیں۔
انتونیو گوتریس نے اپنے خطاب میں پاکستان کی قوم کو طاقت، عزم اور ہمدردی کے جذبات رکھنے والی قوم قرار دیا، جبکہ اپنی تقریر کے دوران علامہ محمد اقبال کی شاعری کا بھی حوالہ دیا۔
President Asif Ali Zardari confers Nishan-e-Imtiaz on UN Secretary-General Antonio Guterres in recognition of his international services, diplomacy and efforts for peaceful conflict resolution.
