بیپا افسران کی ناقص کارکردگی اور غیر حاضری برداشت نہیں ہوگی، نور احمد پرکانی
صنعتی یونٹس اور فیکٹریوں کا مکمل ڈیٹا مرتب کرنے کی ہدایت
کوئٹہ: سیکرٹری ماحولیات و موسمیاتی تبدیلی بلوچستان نور احمد پرکانی نے بلوچستان انوائرمنٹ پروٹیکشن ایجنسی (بیپا) کا دورہ کیا، جہاں انہیں ادارے کی کارکردگی، جاری منصوبوں، عوامی شکایات، ماحولیاتی قوانین پر عملدرآمد اور درپیش مسائل کے حوالے سے تفصیلی بریفنگ دی گئی۔
اس موقع پر سیکرٹری ماحولیات نے کہا کہ موسمیاتی تبدیلیوں اور بڑھتی ہوئی ماحولیاتی آلودگی کے پیش نظر بیپا کی مؤثر کارکردگی وقت کی اہم ضرورت ہے۔ انہوں نے واضح کیا کہ افسران کی ناقص کارکردگی یا غیر حاضری کسی صورت برداشت نہیں کی جائے گی۔
فضائی آلودگی اور ماحولیاتی خلاف ورزیوں کے خلاف کارروائی کی ہدایت
نور احمد پرکانی نے فضائی آلودگی، پولٹری اور ڈیری فارمز، سیوریج کے پانی سے کاشتکاری اور دیگر environmental violations کے خلاف مؤثر کارروائی کی ہدایت کی۔
انہوں نے صنعتی یونٹس اور فیکٹریوں کا مکمل ڈیٹا مرتب کرنے اور ماحولیاتی قوانین پر عملدرآمد کو یقینی بنانے کے لیے مؤثر مانیٹرنگ کا نظام مزید بہتر بنانے پر زور دیا۔
عوامی شکایات کی باقاعدہ مانیٹرنگ، غیر ضروری اٹیچمنٹس ختم کرنے کی ہدایت
سیکرٹری ماحولیات نے عوامی شکایات کی باقاعدہ مانیٹرنگ اور بروقت ازالے کی ہدایت کرتے ہوئے ملازمین کی روزانہ حاضری یقینی بنانے پر زور دیا۔
انہوں نے ادارے میں غیر ضروری اٹیچمنٹس ختم کرنے اور افسران و ملازمین کی ذمہ داریوں کو مؤثر بنانے کی بھی ہدایت کی۔
بیپا کو درپیش مسائل حل کرنے کے لیے سفارشات طلب
نور احمد پرکانی نے بلوچستان انوائرمنٹ پروٹیکشن ایجنسی کو درپیش سہولیات کی کمی دور کرنے کے لیے قابلِ عمل سفارشات تیار کرنے کی ہدایت کی۔
انہوں نے کہا کہ ماحولیات کے تحفظ اور عوامی مفاد کے لیے ہر ممکن اقدامات کیے جائیں گے، جبکہ خواتین افسران اور ملازمین کو محفوظ اور سازگار ماحول کی فراہمی بھی حکومت کی ترجیحات میں شامل ہے۔
