وزیراعلیٰ بلوچستان میر سرفراز بگٹی کا ان سروس پیکیج آف ہیلتھ سروسز کی افتتاحی تقریب سے خطاب

بانی پاکستان کی برسی پر وزیراعلیٰ بلوچستان کا خراجِ عقیدت، آئین، قانون، مضبوط اداروں اور قومی یکجہتی کو ملکی استحکام کی بنیاد قرار دیا

کوئٹہ، 11 ستمبر: وزیراعلیٰ بلوچستان میر سرفراز بگٹی نے بانی پاکستان قائداعظم محمد علی جناح کی برسی کے موقع پر اپنے پیغام میں کہا ہے کہ قائداعظم کا پاکستان ہماری نسلوں کی امانت ہے اور اس کی مضبوطی ہی بانی پاکستان کو حقیقی خراجِ عقیدت ہے۔

قائداعظم کی سب سے بڑی میراث پاکستان ہے

میر سرفراز بگٹی نے کہا کہ قائداعظم کی سب سے بڑی میراث پاکستان ہے۔ انہوں نے اپنی سیاسی جدوجہد کو ذاتی مفاد کے بجائے قومی مقصد کے لیے وقف رکھا، جبکہ قانون کی بالادستی، دیانت داری اور نظم و ضبط ان کے بنیادی اصولوں میں شامل تھے۔

آئین اور مضبوط اداروں سے ریاستیں مضبوط ہوتی ہیں

وزیراعلیٰ بلوچستان نے کہا کہ ریاستیں نعروں سے نہیں بلکہ آئین، قانون، مضبوط اداروں اور ذمہ دار قیادت سے مضبوط ہوتی ہیں۔ قائداعظم کے اصول آج بھی پاکستان کے لیے عملی رہنمائی کا ذریعہ ہیں اور ان پر عمل کرکے ملک کو مستحکم، خوشحال اور باوقار ریاست بنایا جا سکتا ہے۔

مساوی حقوق اور مواقع کی فراہمی ضروری

انہوں نے کہا کہ قائداعظم کے پاکستان میں ہر صوبے اور ہر شہری کو مساوی احترام، مواقع اور حقوق حاصل ہونے چاہئیں۔ پاکستان کی ترقی کے لیے قومی یکجہتی اور اجتماعی ذمہ داری کو فروغ دینا ہوگا۔

نوجوان پاکستان کا روشن مستقبل ہیں

میر سرفراز بگٹی نے کہا کہ نوجوانوں کو آگے بڑھنے کے مواقع فراہم کرنا پاکستان کے روشن مستقبل کی ضمانت ہے۔ قائداعظم کی برسی صرف ماضی کو یاد کرنے کا دن نہیں بلکہ مستقبل کے لیے قومی عہد کی تجدید کا موقع بھی ہے۔

انہوں نے کہا کہ قائداعظم جسمانی طور پر ہمارے درمیان موجود نہیں، تاہم ان کا پاکستان اور ان کے اصول آج بھی قوم کی رہنمائی کر رہے ہیں۔ قائداعظم کے افکار کو عملی کردار میں ڈھال کر پاکستان کو مزید مستحکم اور خوشحال بنایا جا سکتا ہے۔

Balochistan CM Sarfraz Bugti Pays Tribute to Quaid-e-Azam, Calls for Rule of Law, National Unity and Equal Rights in Pakistan