کوئٹہ میں یومِ استحصالِ کشمیر کے موقع پر ضلعی انتظامیہ کے زیرِ اہتمام ریلی نکالی گئی، جبکہ وزیر داخلہ بلوچستان میر ضیاء اللہ لانگو نے کشمیری عوام کی جدوجہد اور حقِ خودارادیت کی حمایت کا اعادہ کیا۔
کوئٹہ میں یومِ استحصالِ کشمیر پر ریلی
کوئٹہ میں یومِ استحصالِ کشمیر کے موقع پر ضلعی انتظامیہ کے زیرِ اہتمام ایک ریلی کا انعقاد کیا گیا، جس میں سرکاری افسران، حریت رہنماؤں اور شہریوں کی بڑی تعداد نے شرکت کی۔
ریلی ڈپٹی کمشنر آفس سے شروع ہوئی اور شہر کے مختلف راستوں سے گزرتے ہوئے دوبارہ ڈی سی آفس پر اختتام پذیر ہوئی۔
شرکاء نے کشمیری عوام سے مکمل یکجہتی کا اظہار کرتے ہوئے کشمیر کی آزادی کے حق میں اور بھارتی مظالم کے خلاف بھرپور نعرے بازی کی۔ اس موقع پر مقررین نے کہا کہ کشمیری عوام کئی دہائیوں سے اپنے حقِ خودارادیت کی جدوجہد جاری رکھے ہوئے ہیں اور ان کی قربانیاں ناقابلِ فراموش ہیں۔
ریلی کے شرکاء نے کشمیری عوام کی لازوال قربانیوں کو خراجِ تحسین پیش کرتے ہوئے اس عزم کا اعادہ کیا کہ پاکستان ہر محاذ پر کشمیریوں کی اخلاقی، سفارتی اور سیاسی حمایت جاری رکھے گا۔
وزیر داخلہ بلوچستان کا یومِ استحصالِ کشمیر پر پیغام
وزیر داخلہ بلوچستان میر ضیاء اللہ لانگو نے کہا کہ یومِ استحصالِ کشمیر کشمیری عوام سے اظہارِ یکجہتی کا دن ہے اور کشمیری عوام کی قربانیاں رائیگاں نہیں جائیں گی۔
انہوں نے کہا کہ پاکستان ہر محاذ پر کشمیریوں کی اخلاقی، سفارتی اور سیاسی حمایت جاری رکھے گا، جبکہ بھارت کشمیری عوام پر مظالم بند کرے اور عالمی برادری صورتحال کا نوٹس لے۔
میر ضیاء اللہ لانگو نے کہا کہ اقوامِ متحدہ کشمیریوں کو حقِ خودارادیت دلانے میں کردار ادا کرے۔ انہوں نے کشمیری عوام کی جدوجہدِ آزادی کو سلام پیش کرتے ہوئے کہا کہ یومِ کشمیر ہمیں کشمیری بھائیوں کے ساتھ کھڑے ہونے کا عہد دلاتا ہے۔
وزیر داخلہ بلوچستان نے کہا کہ بھارت کی ریاستی دہشتگردی خطے کے امن کے لیے خطرہ ہے اور پوری قوم کشمیری عوام کے ساتھ شانہ بشانہ کھڑی ہے۔
