کوئٹہ کے پشین اسٹاپ پر منی پیٹرول پمپ میں آتشزدگی، آگ پر قابو پالیا گیا

کوئٹہ کے پشین اسٹاپ پر منی پیٹرول پمپ میں اچانک آگ بھڑک اٹھی، تاہم پی ڈی ایم اے، ضلعی انتظامیہ اور میٹروپولیٹن کارپوریشن کی بروقت کارروائی سے آگ پر قابو پالیا گیا۔

پشین اسٹاپ پر منی پیٹرول پمپ میں آگ

کوئٹہ کے پشین اسٹاپ پر 26 اگست کو منی پیٹرول پمپ میں آتشزدگی کا واقعہ پیش آیا، جس پر اطلاع ملتے ہی امدادی کارروائیاں شروع کردی گئیں۔

ڈپٹی کمشنر کوئٹہ مہراللہ بادینی کی ہدایات پر اسسٹنٹ کمشنر سٹی نے موقع پر فوری کارروائی کی، جبکہ ضلعی انتظامیہ، میٹروپولیٹن کارپوریشن کوئٹہ اور پی ڈی ایم اے کی ٹیمیں اطلاع ملنے کے چند منٹ بعد جائے وقوعہ پر پہنچ گئیں۔

پی ڈی ایم اے کی امدادی ٹیموں کی کارروائی

پی ڈی ایم اے ریسکیو فورس نے کارروائی میں 4 فائر ٹینڈرز، 4 ایمبولینسز اور ریسکیو اہلکاروں نے حصہ لیا۔ امدادی ٹیموں نے آگ پر قابو پانے کے بعد کولنگ اور حفاظتی کارروائیاں بھی مکمل کیں۔

بروقت کارروائی کے باعث آگ کو مزید پھیلنے سے روک دیا گیا۔

گاڑیوں اور دکانوں کو نقصان

ابتدائی اطلاعات کے مطابق آتشزدگی سے منی پیٹرول پمپ، ملحقہ دودھ کی دکان، سوزوکی بولان اور ویٹز گاڑی مکمل طور پر جل گئیں، جبکہ ایک کرولا گاڑی کو جزوی نقصان پہنچا۔

ابتدائی پی ڈی ایم اے رپورٹ کے مطابق واقعے میں مجموعی طور پر تین گاڑیاں جزوی طور پر متاثر ہوئیں اور دو دکانوں کو نقصان پہنچا۔

آتشزدگی کی وجوہات جاننے کے لیے تحقیقات جاری

پی ڈی ایم اے کے مطابق واقعے میں ایک شخص کو معمولی چوٹ آئی جسے موقع پر ابتدائی طبی امداد فراہم کی گئی، جبکہ ضلعی انتظامیہ کے مطابق کوئی جانی نقصان نہیں ہوا۔

واقعے کی وجوہات اور نقصانات کا حتمی تعین کرنے کے لیے مزید تحقیقات جاری ہیں۔