بلوچستان میں ریکارڈ ترقیاتی کام ہوئے، عوامی فلاح کا سفر جاری رہے گا، وزیراعلیٰ

وزیراعلیٰ بلوچستان میر سرفراز بگٹی نے کہا ہے کہ موجودہ حکومت کے دور میں بلوچستان کی تاریخ کے ریکارڈ ترقیاتی منصوبے شروع اور مکمل کیے گئے ہیں، جبکہ عوامی فلاح و بہبود کا سفر آئندہ بھی جاری رہے گا۔

شمالی ڈیرہ بگٹی میں ترقیاتی منصوبوں کا جائزہ

وزیراعلیٰ میر سرفراز بگٹی نے شمالی ڈیرہ بگٹی میں جاری ترقیاتی منصوبوں کا جائزہ لیا اور حکام کو کام کی رفتار تیز کرنے، معیار یقینی بنانے اور منصوبے مقررہ مدت میں مکمل کرنے کی ہدایت کی۔

انہوں نے یتیم اور نادار بچوں کے لیے زیرِ تعمیر تعلیمی ادارے اور اسپورٹس گراؤنڈ کا بھی دورہ کیا۔ وزیراعلیٰ نے کہا کہ تعلیم معاشرے کی ترقی کی بنیاد ہے، جبکہ نوجوانوں کو کھیلوں اور مثبت سرگرمیوں کے مواقع فراہم کرنا بھی حکومت کی ترجیحات میں شامل ہے۔

صحت اور بنیادی سہولیات حکومت کی ترجیح

میر سرفراز بگٹی نے کہا کہ صحت سمیت بنیادی سہولیات کی فراہمی کے لیے حکومت تمام دستیاب وسائل بروئے کار لا رہی ہے اور ترقیاتی عمل کو دور دراز علاقوں تک وسعت دی جا رہی ہے۔

Balochistan is expanding development opportunities beyond major cities to local communities.

ترقیاتی وسائل ہر علاقے تک پہنچانے کا عزم

وزیراعلیٰ نے واضح کیا کہ ترقیاتی منصوبوں میں ناقص کام کسی صورت قابلِ قبول نہیں اور معیار پر سمجھوتہ کرنے والوں کے خلاف سخت کارروائی کی جائے گی۔

انہوں نے کہا کہ حکومت کا مقصد ترقی کے ثمرات ہر تحصیل اور یونین کونسل تک پہنچانا ہے تاکہ کوئی علاقہ ترقی کے عمل سے محروم نہ رہے۔ بلوچستان کے ہزاروں نوجوانوں کو روزگار کے مواقع فراہم کیے جا چکے ہیں جبکہ تعلیم، ہنر، روزگار اور کھیلوں کے مزید مواقع پیدا کرنے کے لیے اقدامات جاری ہیں۔

اس موقع پر چیف سیکریٹری بلوچستان شکیل قادر خان اور پرنسپل سیکریٹری وزیراعلیٰ بلوچستان عمران زرکون بھی وزیراعلیٰ کے ہمراہ تھے۔