موسیٰ خیل رواں سال حکومت کی خصوصی توجہ کا مرکز ہوگا، وزیراعلیٰ بلوچستان

وزیراعلیٰ بلوچستان میر سرفراز بگٹی سے آل پارٹیز موسیٰ خیل کے نمائندہ وفد نے چیف آف غرشین سردار سید اسد زمان غرشین کی قیادت میں ملاقات کی، جس میں ضلع موسیٰ خیل میں ترقیاتی حکمتِ عملی اور عوامی، انتظامی و ترقیاتی امور پر تبادلہ خیال کیا گیا۔

موسیٰ خیل میں ترقیاتی حکمتِ عملی پر تبادلہ خیال

ملاقات کے دوران وفد نے ضلع موسیٰ خیل میں ترقیاتی حکمتِ عملی پر اطمینان کا اظہار کرتے ہوئے عوامی، انتظامی اور ترقیاتی امور سے متعلق اپنی تجاویز بھی پیش کیں۔

اس موقع پر وزیراعلیٰ میر سرفراز بگٹی نے کہا کہ حکومت بلوچستان صوبے کے تمام اضلاع میں متوازن اور یکساں ترقی کے وژن پر عمل پیرا ہے۔ ان کا کہنا تھا کہ عوامی نمائندوں اور قبائلی عمائدین کی مشاورت سے ترقیاتی منصوبوں کو مزید مؤثر اور عوامی ضروریات سے ہم آہنگ بنایا جا رہا ہے۔

موسیٰ خیل حکومت کی خصوصی توجہ کا مرکز ہوگا

وزیراعلیٰ نے کہا کہ گزشتہ سال ضلع واشک کو خصوصی ترقیاتی پیکج فراہم کیا گیا تھا، جبکہ رواں سال موسیٰ خیل حکومت کی خصوصی توجہ کا مرکز ہوگا۔

انہوں نے یقین دلایا کہ دستیاب وسائل کو بروئے کار لاتے ہوئے پسماندہ اضلاع کی مرحلہ وار ترقی کو یقینی بنایا جائے گا۔

Balanced development remains a key priority for Balochistan’s districts.

کسی ضلع کو ترقی کے سفر میں پیچھے نہیں چھوڑیں گے

میر سرفراز بگٹی نے اس عزم کا اعادہ کیا کہ بلوچستان کے تمام قبائل اور عوام حکومت کے لیے یکساں اہمیت رکھتے ہیں اور ہر علاقے کی ترقی حکومت کی ذمہ داری ہے۔

انہوں نے واضح کیا کہ حکومت صوبے کے کسی بھی ضلع کو متوازن ترقی کے سفر میں پیچھے نہیں چھوڑے گی۔