گوادر میں تعلیم، عوامی مسائل اور انتظامی امور کی بہتری کے لیے اقدامات جاری

وزیراعلیٰ بلوچستان میر سرفراز بگٹی کی ہدایت پر ضلعی انتظامیہ گوادر کی جانب سے تعلیم، عوامی سہولیات، ثقافت اور انتظامی امور میں بہتری کے لیے مختلف اقدامات جاری ہیں۔

تعلیمی اداروں کی مانیٹرنگ جاری

گوادر: ضلعی انتظامیہ گوادر کی جانب سے ’’ہر بچہ اسکول میں‘‘ وژن کے تحت تعلیمی اداروں کی نگرانی جاری ہے۔ اساتذہ اور طلبہ کی حاضری سمیت تعلیمی سرگرمیوں کا جائزہ لیا جا رہا ہے تاکہ معیاری تعلیم، بہتر حاضری اور طلبہ کے روشن مستقبل کے لیے مؤثر اقدامات کیے جاسکیں۔

نیو ٹاؤن ہاؤسنگ اسکیم میں تجاوزات کے خاتمے کا فیصلہ

ضلعی انتظامیہ کی زیر صدارت نیو ٹاؤن ہاؤسنگ اسکیم سے متعلق جائزہ اجلاس میں تجاوزات اور غیر قانونی قبضوں کے خاتمے کا فیصلہ کیا گیا۔

اجلاس میں طے کیا گیا کہ ریکارڈ کی جانچ کے بعد اصل پلاٹ مالکان کے حقوق کا تحفظ یقینی بنایا جائے گا اور قانونی تقاضے مکمل ہونے پر پلاٹس مالکان کے حوالے کیے جائیں گے۔

بلوچی زبان و ثقافت کے فروغ کے لیے اقدام

ضلعی انتظامیہ گوادر نے بلوچی زبان، سینما اور مقامی ثقافت کے فروغ میں نمایاں خدمات پر معروف فنکار سرفراز احمد کو اعزاز سے نوازا۔

ان کی فنی خدمات کو سراہتے ہوئے بلوچستان کے ثقافتی ورثے کے تحفظ اور فروغ کے عزم کا اظہار کیا گیا۔

پیشکان میں عوامی مسائل سنے گئے

پیشکان میں منعقدہ کھلی کچہری کے دوران شہریوں کے مسائل سنے گئے اور اراضی، جیٹی اور بنیادی سہولیات سے متعلق مسائل کے حل کے لیے اقدامات کیے گئے۔

ماہی گیروں اور کاروباری حلقوں کے درمیان چھ ماہ سے جاری تنازع بھی باہمی کوششوں سے حل کرایا گیا۔

ایم ایم ڈی دفتر میں حاضری کا جائزہ

ایم ایم ڈی دفتر کے معائنے کے دوران 35 میں سے صرف 3 ملازمین حاضر پائے گئے۔ معائنے میں دفتری حاضری، مشینری اور انتظامی امور کا جائزہ لیا گیا۔

ضلعی انتظامیہ نے نظم و ضبط، کارکردگی اور عوامی خدمت کے معیار کو مزید بہتر بنانے پر توجہ دینے پر زور دیا۔