بہن کینسر میں مبتلا، اداکارہ میرا کی برطانوی سفارتخانے سے ویزا جاری کرنے کی درخواست

اداکارہ نے کہا کہ بہن شائستہ عباس کی حالت تشویشناک ہے، والدہ اور بھائی بھی لندن میں موجود ہیں

نیویارک: پاکستان کی سینئر اداکارہ میرا نے اپنی بہن شائستہ عباس کی علالت کے باعث برطانوی سفارتخانے سے لندن جانے کے لیے انسانی ہمدردی کی بنیاد پر ویزا جاری کرنے کی درخواست کردی۔

بہن کو کینسر کی تشخیص

اداکارہ میرا نے سوشل میڈیا پر جاری ویڈیو پیغام میں بتایا کہ وہ اس وقت نیویارک میں موجود ہیں جبکہ ان کی بہن شائستہ عباس لندن میں ہیں، جنہیں کینسر کی تشخیص ہوئی ہے اور ان کی حالت انتہائی تشویشناک ہے۔

میرا نے برطانوی سفارتخانے سے درخواست کی کہ انہیں اپنی بہن سے ملاقات کے لیے لندن جانے کی اجازت دی جائے۔

والدہ اور بھائی بھی لندن میں موجود

اداکارہ نے بتایا کہ ان کی والدہ اور بھائی بھی لندن میں موجود ہیں اور وہ اپنی بہن کے پاس پہنچنا چاہتی ہیں۔

میرا نے اپنی درخواست میں انسانی ہمدردی کی بنیاد پر ویزا جاری کرنے کی اپیل کی ہے تاکہ وہ اپنی بہن سے ملاقات کرسکیں۔

برطانیہ میں داخلے پر پابندی کا معاملہ

واضح رہے کہ اداکارہ میرا کے برطانیہ میں داخلے پر ماضی میں 10 سال کی پابندی عائد کی گئی تھی۔

میڈیا رپورٹس کے مطابق میرا کی بہن شائستہ عباس نے بتایا تھا کہ ویزا درخواست فارم میں انگریزی سے متعلق غلطی کے باعث برطانوی حکام نے یہ پابندی عائد کی تھی۔ ان کے مطابق پابندی کی مدت اب مکمل ہوچکی ہے۔

Pakistani Actress Meera Requests Emergency UK Visa as Sister Battles Advanced Cancer