شہداء کے ہر خاندان کے ایک فرد کو سرکاری ملازمت دینے کا اعلان
زیارت پہنچنے پر وزیراعلیٰ بلوچستان کو پولیس کے چاک و چوبند دستے کی سلامی
زیارت: وزیراعلیٰ بلوچستان میر سرفراز بگٹی نے کہا ہے کہ زیارت سانحہ کے شہداء کے خاندانوں کو حکومت کبھی تنہا نہیں چھوڑے گی، شہداء کے بچوں کی 16 سال تک تعلیم کے تمام اخراجات حکومت برداشت کرے گی جبکہ ہر شہید کے خاندان کے ایک فرد کو سرکاری ملازمت بھی دی جائے گی۔
وزیراعلیٰ بلوچستان میر سرفراز بگٹی زیارت پہنچے جہاں انہوں نے قائد ریزیڈنسی پر حاضری دی۔ اس موقع پر پولیس کے چاک و چوبند دستے نے انہیں سلامی پیش کی۔ وزیراعلیٰ نے شہداء زیارت کے لواحقین سے ملاقات کی، ان سے اظہار تعزیت اور یکجہتی کیا اور شہداء کے درجات کی بلندی کے لیے دعا کی۔
اس موقع پر وزیراعلیٰ بلوچستان نے متاثرہ خاندانوں میں معاونتی چیکس بھی تقسیم کیے اور تقریب سے خطاب کرتے ہوئے شہداء کے اہلخانہ کے لیے مالی معاونت، تعلیم، سرکاری ملازمت اور طبی سہولیات سمیت متعدد اہم اعلانات کیے۔
شہداء کے خاندانوں کے لیے ایک کروڑ 10 لاکھ روپے فی خاندان معاوضہ
میر سرفراز بگٹی نے اعلان کیا کہ Ziarat tragedy victims کے لواحقین کے لیے فی خاندان ایک کروڑ 10 لاکھ روپے معاوضہ منظور کرلیا گیا ہے اور اس حوالے سے فنڈز بھی جاری کردیئے گئے ہیں۔
انہوں نے کہا کہ شہداء کے بچوں کی 16 سال تک تعلیم کے تمام اخراجات حکومت بلوچستان برداشت کرے گی، جبکہ ہر شہید کے خاندان کے ایک فرد کو سرکاری ملازمت دی جائے گی۔ متاثرہ خاندانوں کو مکمل طبی سہولیات بھی فراہم کی جائیں گی۔
سانحے کی شفاف تحقیقات، ذمہ داروں کے خلاف کارروائی ہوگی
وزیراعلیٰ بلوچستان نے کہا کہ زیارت واقعہ کی شفاف تحقیقات کے لیے قائم انکوائری کمیٹی اپنی رپورٹ کی روشنی میں ذمہ داروں کا تعین کرے گی۔ سانحے کے ذمہ داروں اور غفلت کے مرتکب افراد کے خلاف بلاامتیاز کارروائی عمل میں لائی جائے گی۔
انہوں نے کہا کہ شہداء قوم کا فخر اور ہمارے ماتھے کا جھومر ہیں، ان کی قربانیاں ہمیشہ یاد رکھی جائیں گی۔ حکومت شہداء کے لواحقین کو کبھی تنہا نہیں چھوڑے گی، ہر ممکن کفالت ریاست کی ذمہ داری ہے۔
دہشت گردی کا اسلام، بلوچ اور پشتون روایات سے کوئی تعلق نہیں، سرفراز بگٹی
میر سرفراز بگٹی نے کہا کہ دہشت گردی کا نہ اسلام سے تعلق ہے اور نہ ہی بلوچ و پشتون روایات سے۔ بلوچستان پولیس، ایف سی اور سیکیورٹی فورسز کی قربانیاں پوری قوم کے لیے باعث فخر ہیں۔
انہوں نے کہا کہ دشمن کے پروپیگنڈے کا حصہ بننے کے بجائے ریاستی اداروں کا ساتھ دینا ہوگا۔ پاکستان کی سلامتی، قومی اتحاد اور ریاستی اداروں کا استحکام ہم سب کی مشترکہ ذمہ داری ہے۔
وزیراعلیٰ بلوچستان نے شہداء کے خاندانوں کو یقین دہانی کرائی کہ وہ ہر قدم پر ان کے ساتھ کھڑے رہیں گے اور ان کے لیے ان کے دروازے ہمیشہ کھلے ہیں۔
