خصوصی بچوں کی تعلیم، تربیت، نگہداشت اور بحالی کے لیے معیاری سہولیات فراہم کرنے کے عزم کا اظہار
کوئٹہ: خصوصی بچوں کی فلاح و بہبود اور انہیں معاشرے میں باوقار مقام دلانے کے لیے کوئٹہ میں سینٹر آف ایکسیلینس ڈیف ریچ سینٹر کا افتتاح کردیا گیا۔ مرکز کا افتتاح پارلیمانی سیکرٹری برائے سماجی بہبود حاجی ولی محمد نورزئی اور وفاقی وزیر برائے قومی ورثہ و ثقافت اورنگزیب خان کچی نے مشترکہ طور پر کیا۔
خصوصی بچوں کے لیے جدید سہولیات
اس موقع پر گفتگو کرتے ہوئے حاجی ولی محمد نورزئی نے کہا کہ خصوصی بچوں کی تعلیم، تربیت، نگہداشت اور بحالی کے لیے ایسے اداروں کا قیام حکومت کی اہم ترجیحات میں شامل ہے۔
انہوں نے کہا کہ نیا مرکز خصوصی بچوں کو معیاری تعلیمی سہولیات، جدید تربیت اور معاون ماحول فراہم کرنے کے ساتھ ان کی صلاحیتوں کو اجاگر کرنے اور خوداعتمادی بڑھانے میں بھی اہم کردار ادا کرے گا۔
خصوصی افراد کی فلاح مشترکہ ذمہ داری
وفاقی وزیر برائے قومی ورثہ و ثقافت اورنگزیب خان کچی نے کہا کہ خصوصی بچوں کی فلاح و بہبود پورے معاشرے کی مشترکہ ذمہ داری ہے۔
انہوں نے کہا کہ خصوصی بچوں کی صلاحیتوں کو نکھارنے اور انہیں قومی ترقی کے دھارے میں شامل کرنے کے لیے مؤثر اقدامات ناگزیر ہیں۔ انہوں نے سینٹر کے قیام کو خوش آئند قرار دیتے ہوئے امید ظاہر کی کہ یہ ادارہ خصوصی بچوں اور ان کے خاندانوں کے لیے سہولت، رہنمائی اور امید کا مرکز ثابت ہوگا۔
خصوصی افراد کی شمولیت کے عزم کا اظہار
دونوں رہنماؤں نے خصوصی افراد کے حقوق کے تحفظ، انہیں باوقار زندگی کی فراہمی اور معاشرے میں ان کی بھرپور شمولیت کے لیے مشترکہ کوششیں جاری رکھنے کے عزم کا اظہار کیا۔
Centre of Excellence Deaf Reach Centre Inaugurated in Quetta to Support Children with Special Needs
