کوہلو میں پانچ روزہ تربیتی ورکشاپ اختتام پذیر

بلوچستان کی ترقی اور روشن مستقبل نوجوان نسل کی تعلیم، شعور اور مثبت کردار سے وابستہ ہے، کمانڈنٹ میوند بریگیڈ

’’بلوچستان میں ترقی، شعور و آگاہی‘‘ کے عنوان سے ورکشاپ

میوند بریگیڈ ہیڈکوارٹر میں کوہلو اور بارکھان کے طلبہ و طالبات، نوجوانوں، صحافیوں اور مختلف شعبہ ہائے زندگی سے تعلق رکھنے والے افراد کے لیے پانچ روزہ تربیتی ورکشاپ اختتام پذیر ہوگئی۔

’’بلوچستان میں ترقی، شعور و آگاہی‘‘ کے عنوان سے منعقدہ ورکشاپ کی اختتامی تقریب کے مہمان خصوصی کمانڈنٹ میوند بریگیڈ کرنل نصیر احمد تھے۔

نوجوان بلوچستان کے روشن مستقبل کی امید

تقریب سے خطاب کرتے ہوئے کرنل نصیر احمد نے کہا کہ بلوچستان کی ترقی، خوشحالی اور روشن مستقبل نوجوان نسل سے وابستہ ہے۔ تعلیم، شعور، مثبت سوچ اور ذمہ دارانہ کردار معاشرے کی ترقی کی بنیاد ہیں۔

انہوں نے کہا کہ بلوچستان کے نوجوان تعلیم، تحقیق اور ہنر کے ذریعے نہ صرف اپنے مستقبل کو بہتر بنا سکتے ہیں بلکہ صوبے کی ترقی میں بھی اہم کردار ادا کرسکتے ہیں۔

ترقی، شعور اور معاشرتی ذمہ داریوں پر تربیت

پانچ روزہ ورکشاپ کے دوران شرکاء کو بلوچستان میں ترقی، نوجوانوں کے کردار، شعور و آگاہی اور معاشرتی ذمہ داریوں سمیت مختلف اہم موضوعات پر تربیت فراہم کی گئی۔

شرکاء میں اسناد اور تحائف تقسیم

اختتامی تقریب میں ونگ کمانڈر لیفٹیننٹ کرنل سرمد زمان، بریگیڈ میجر امیر اور دیگر متعلقہ حکام بھی موجود تھے۔

تقریب کے اختتام پر ورکشاپ میں شریک افراد میں اسناد اور تحائف بھی تقسیم کیے گئے۔

Five-Day Training Workshop on Balochistan Development and Youth Awareness Concludes in Kohlu