لاہور میں بلوچستان اکنامک اینڈ انویسٹمنٹ فورم 2026 کے دوران صوبے میں سرمایہ کاری، صنعتی ترقی اور کاروباری اشتراک کے مواقع اجاگر کیے گئے، جبکہ سرکاری اور نجی شعبوں کے درمیان تعاون بڑھانے پر زور دیا گیا۔
بلوچستان میں سرمایہ کاری کے فروغ کیلئے فورم کا انعقاد
وزیراعلیٰ بلوچستان میر سرفراز بگٹی کے وژن اور ہدایات کے مطابق بلوچستان سرمایہ کاری بورڈ (BBoIT) اور فیڈریشن آف پاکستان چیمبرز آف کامرس اینڈ انڈسٹری (FPCCI) کے اشتراک سے لاہور میں بلوچستان اکنامک اینڈ انویسٹمنٹ فورم 2026 منعقد ہوا۔فورم کا مقصد ملکی سرمایہ کاروں اور کاروباری برادری کو بلوچستان کے قدرتی وسائل، معاشی استعداد اور سرمایہ کاری کے مواقع سے آگاہ کرنا اور صوبے میں کاروباری سرگرمیوں کو فروغ دینا تھا۔
سرمایہ کاری کیلئے سرکاری اور نجی شعبے میں اشتراک پر زور
فورم کے مہمانِ خصوصی، یونائیٹڈ بزنس گروپ کے سرپرستِ اعلیٰ اور سابق صوبائی وزیر پنجاب ایس ایم تنویر نے اپنے خطاب میں کہا کہ ایسے فورمز سرمایہ کاری کے فروغ، کاروباری روابط مضبوط بنانے اور سرکاری و نجی شعبوں کے درمیان تعاون بڑھانے میں اہم کردار ادا کرتے ہیں۔بلوچستان سرمایہ کاری بورڈ کے وائس چیئرمین بلال خان کاکڑ نے کہا کہ صوبائی حکومت سرمایہ کاری کیلئے سازگار ماحول فراہم کرنے اور معاشی ترقی کے فروغ کیلئے پرعزم ہے۔ انہوں نے پائیدار معاشی ترقی کیلئے حکومت اور نجی شعبے کے درمیان اشتراک کو ضروری قرار دیا۔
The forum aimed to connect investors with business opportunities and support economic development across Balochistan.
مختلف شعبوں میں سرمایہ کاری کے امکانات پر بریفنگ
فورم سے ایف پی سی سی آئی کے صدر عاطف اکرام شیخ اور کوئٹہ چیمبر آف کامرس اینڈ انڈسٹری کے سرپرستِ اعلیٰ حاجی غلام فاروق خلجی نے بھی خطاب کیا، جبکہ بلوچستان سرمایہ کاری بورڈ کے چیف ایگزیکٹو آفیسر عبد المنان نے سرمایہ کاری کے فروغ کیلئے جاری اقدامات اور کاروباری مواقع پر بریفنگ دی۔شرکاء کو بزنس فیسلیٹیشن سینٹر (BFC)، بلوچستان کے معدنی وسائل اور بلوچستان بزنس ایکسپو سے متعلق ویڈیوز بھی دکھائی گئیں۔فورم میں صنعت، ماہی گیری، معدنیات، لائیو اسٹاک اور دیگر شعبوں سے متعلق پریزنٹیشنز پیش کی گئیں۔ سوال و جواب کے سیشن میں سرمایہ کاروں کو مختلف شعبوں میں دستیاب مواقع سے آگاہ کیا گیا۔
