وزیراعلیٰ میر سرفراز بگٹی کی ہدایات پر سکیورٹی اور سہولیات کی فراہمی یقینی بنانے کے اقدامات، کشش چوہدری فوکل پرسن مقرر
لسبیلہ: وزیراعلیٰ بلوچستان میر سرفراز بگٹی کی ہدایات پر ہنگلاج ماتا استھان میں درگا اشٹمی کی مذہبی تقریبات کے موقع پر ہندو یاتریوں کی سہولت، سکیورٹی اور مذہبی رسومات کی پُرامن ادائیگی کے لیے خصوصی انتظامات کیے گئے ہیں۔
حکومت بلوچستان کی جانب سے ان اقدامات کا مقصد یاتریوں کو پُرامن ماحول فراہم کرنا اور مذہبی تقریبات کے دوران ضروری سہولیات کی دستیابی یقینی بنانا ہے، تاکہ ملک بھر سے آنے والے ہندو عقیدت مند اپنی مذہبی رسومات آزادی اور اطمینان کے ساتھ ادا کر سکیں۔
اقلیتوں کے حقوق کا تحفظ، حکومت کی ترجیح
تقریبات کے انتظامات کے لیے بلوچستان کی پہلی ہندو خاتون اسسٹنٹ کمشنر کشش چوہدری کو فوکل پرسن مقرر کیا گیا ہے۔ اس اقدام کو اقلیتوں کی نمائندگی، مذہبی رواداری اور بین المذاہب ہم آہنگی کے فروغ کی جانب ایک اہم پیش رفت قرار دیا جا رہا ہے۔
ہر شہری کو مذہبی آزادی اور احترام کا حق حاصل ہے
وزیراعلیٰ بلوچستان میر سرفراز بگٹی کی قیادت میں صوبائی حکومت کا مؤقف ہے کہ بلوچستان میں بسنے والے ہر شہری کو، خواہ اس کا تعلق کسی بھی مذہب، عقیدے یا برادری سے ہو، عزت، تحفظ اور پُرامن زندگی گزارنے کا حق حاصل ہے۔
مذہبی تنوع صوبے کے معاشرتی تشخص کا اہم حصہ ہے اور تمام مذاہب کے پیروکاروں کے عقائد، عبادت گاہوں اور مذہبی رسومات کا احترام ایک پُرامن اور ہم آہنگ معاشرے کی بنیاد ہے۔
مذہبی ہم آہنگی اور مشترکہ سماجی ذمہ داری
ہنگلاج ماتا استھان میں درگا اشٹمی کے موقع پر کیے جانے والے انتظامات اس امر کی اہمیت اجاگر کرتے ہیں کہ مختلف مذاہب سے تعلق رکھنے والے شہریوں کو یکساں احترام اور تحفظ فراہم کیا جائے۔ مذہبی رواداری صرف حکومتی ذمہ داری نہیں بلکہ معاشرے کے ہر فرد کا فرض بھی ہے۔
حکومت بلوچستان کے اس عزم کا اظہار کیا گیا ہے کہ صوبے میں کسی بھی شہری کو اس کے مذہب یا عقیدے کی بنیاد پر امتیازی سلوک کا سامنا نہیں ہونا چاہیے اور ہر فرد کو اپنے مذہبی عقائد کے مطابق زندگی گزارنے کا حق حاصل ہونا چاہیے۔
بلوچستان سب کا ہے، اور یہاں بسنے والے ہر فرد کو عزت، تحفظ، مذہبی آزادی اور پُرامن زندگی گزارنے کا حق دیا جائے گا۔ تمام مذاہب کا احترام، اقلیتوں کے حقوق کا تحفظ اور باہمی رواداری ہی ایک مضبوط، پُرامن اور متحد معاشرے کی بنیادہیں
Balochistan Makes Special Arrangements for Hindu Pilgrims at Hinglaj Mata Shrine During Durga Ashtami
