دو روزہ نمائش میں بلوچستان سمیت ملک بھر کی خواتین اپنی مصنوعات اور تخلیقی صلاحیتیں پیش کررہی ہیں، تربیتی نشستوں اور ورکشاپس کا بھی اہتمام
کوئٹہ، 31 اکتوبر 2026: بلوچستان میں خواتین کو معاشی طور پر بااختیار بنانے اور ان کی کاروباری صلاحیتوں کو اجاگر کرنے کے لیے پہلی ویمن انٹرپرینیورز ایگزیبیشن (WEXNET 2026) کا بیوٹمز ایکسپو ہال میں باقاعدہ افتتاح کردیا گیا۔
دو روزہ نمائش میں بلوچستان سمیت پاکستان کے مختلف علاقوں سے تعلق رکھنے والی تقریباً 100 خواتین کے زیرِ انتظام کاروباری ادارے اپنی مصنوعات، تخلیقی ہنر اور کاروباری کامیابیوں کی نمائش کررہے ہیں۔
WEXNET 2026 Opens in Quetta, Showcasing Products from 100 Women Entrepreneurs
روایتی دستکاری، زیورات اور مقامی مصنوعات شرکاء کی توجہ کا مرکز
نمائش میں روایتی ملبوسات، دستکاری، مقامی کھانے پینے کی مصنوعات، قیمتی پتھر، زیورات اور دیگر کاروباری مصنوعات کے اسٹالز سجائے گئے ہیں، جہاں خواتین کاروباری شخصیات کو اپنی مصنوعات متعارف کرانے اور صارفین تک براہ راست رسائی حاصل کرنے کا موقع فراہم کیا جارہا ہے۔
خواتین کاروباری شخصیات کے لیے نالج ہب بھی قائم
ٹریڈ ڈویلپمنٹ اتھارٹی آف پاکستان (TDAP) اور بلوچستان بورڈ آف انویسٹمنٹ اینڈ ٹریڈ (BBIT) کے اشتراک سے منعقدہ نمائش میں خواتین کاروباری شخصیات کے لیے خصوصی نالج ہب بھی قائم کیا گیا ہے۔
اس کے تحت تربیتی نشستوں، سیمینارز اور ورکشاپس کا انعقاد کیا جارہا ہے، جن کا مقصد خواتین کو کاروباری مہارتوں میں بہتری، مارکیٹ تک رسائی اور اپنے کاروبار کو وسعت دینے کے مواقع فراہم کرنا ہے۔
WEXNET کوئٹہ یکم نومبر تک جاری رہے گی
WEXNET کوئٹہ 2026 کا انعقاد 31 اکتوبر سے یکم نومبر تک جاری رہے گا۔ نمائش کا مقصد خواتین کے کاروباری کردار کو فروغ دینا، مقامی مصنوعات کو قومی سطح پر متعارف کرانا اور خواتین کے لیے معاشی ترقی کے نئے مواقع پیدا کرنا ہے
