آٹھ روزہ دورے کا مقصد دوطرفہ تعلقات، ثقافتی سفارت کاری اور تعلیمی تعاون کو فروغ دینا ہے
اسلام آباد: سری لنکا کے 16 رکنی اعلیٰ سطحی وفد نے آٹھ روزہ پاکستان بدھ مت ورثہ آگاہی دورے کے سلسلے میں پاکستان پہنچ گیا ہے۔ دورے کا مقصد پاکستان اور سری لنکا کے درمیان دوطرفہ تعلقات کو مزید مستحکم بنانے کے ساتھ گندھارا تہذیب، آثارِ قدیمہ، تعلیم، ثقافتی ورثے کے تحفظ اور عوامی روابط کے شعبوں میں تعاون کو فروغ دینا ہے۔
وفد میں ماہرینِ آثارِ قدیمہ، تعلیمی شخصیات اور بدھ مت رہنما شامل
وفد میں سری لنکا کے محکمہ آثارِ قدیمہ کے ڈائریکٹر جنرل ڈاکٹر ای اے سینارتھ ڈسانائیکے، سابق ڈائریکٹر جنرل پروفیسر پی ڈی منڈاوالا، سابق سولیسٹر جنرل دلروکشی ڈائس وکرما سنگھے سمیت بدھ مت کمیونٹی کے رہنما، ماہرین تعلیم، کاروباری شخصیات، قانونی ماہرین اور صحافی شامل ہیں۔ وفد کی قیادت آسٹریلیا میں بودھی دھما بدھسٹ ایسوسی ایشن کے صدر مسٹر دیپتھا وکرامارتنا کر رہے ہیں۔
وزیراعظم ٹاسک فورس برائے گندھارا کے تحت دورے کا اہتمام
اس اقدام کا اہتمام وزیراعظم ٹاسک فورس برائے گندھارا کے کوآرڈینیٹر عمران شوکت نے وفاقی وزیر برائے قومی ورثہ و ثقافت اورنگزیب خان کھیچی کی سربراہی میں کیا ہے۔
پاکستان نیشنل کونسل آف دی آرٹس میں وفد کا پرتپاک استقبال
پاکستان نیشنل کونسل آف دی آرٹس اسلام آباد میں وفد کا باضابطہ استقبال وفاقی وزیر اورنگزیب خان کھیچی، سیکریٹری قومی ورثہ و ثقافت ڈویژن اسد رحمان گیلانی، سری لنکا کے پاکستان میں ہائی کمشنر ریئر ایڈمرل (ر) فریڈ سینے ویراتنے اور ڈپٹی ہائی کمشنر کرسٹی روبن نے کیا۔
ہزارہ یونیورسٹی اور سری لنکن یونیورسٹی کے درمیان مفاہمتی یادداشت پر دستخط
دورے کے پہلے روز ہزارہ یونیورسٹی مانسہرہ اور سری لنکا کی ناگنندا انٹرنیشنل بدھسٹ یونیورسٹی کے درمیان مفاہمتی یادداشت پر دستخط کیے گئے۔ معاہدے کے تحت طلبہ اور اساتذہ کے تبادلوں، آثارِ قدیمہ، بدھ مت کے مطالعات، مشترکہ تحقیق، تعلیمی پروگراموں اور ثقافتی ورثے کے تحفظ کے شعبوں میں تعاون کو فروغ دیا جائے گا۔
مفاہمتی یادداشت پر ہزارہ یونیورسٹی کے شعبہ آثارِ قدیمہ کے چیئرمین اور فیکلٹی آف آرٹس اینڈ ہیومینٹیز کے ڈین ڈاکٹر شاکر اللہ اور ناگنندا انٹرنیشنل بدھسٹ یونیورسٹی کے بانی پروفیسر پی ڈی منڈاوالا نے دستخط کیے۔ اس موقع پر وفاقی وزیر، ہزارہ یونیورسٹی کے وائس چانسلر پروفیسر ڈاکٹر اکرام اللہ خان اور دیگر اہم شخصیات بھی موجود تھیں۔
سری لنکن وفد کا اسلام آباد میوزیم کا دورہ
تقریب کے بعد سری لنکن وفد نے اسلام آباد میوزیم کا دورہ کیا، جہاں وفد کو آثارِ قدیمہ کے تاریخی ذخیرے اور پاکستان کی گندھارا تہذیب و بدھ مت ورثے کے حوالے سے آگاہی فراہم کی گئی۔
سری لنکا میں پاکستان کے تاریخی ورثے پر آٹھ اقساط پر مشتمل ٹی وی سیریز نشر ہوگی
دورے کے دوران سری لنکا کے معروف ٹی وی میزبان اور میڈیا شخصیت چتھورا الوِس اپنی پروفیشنل پروڈکشن ٹیم کے ہمراہ پاکستان کے تاریخی مقامات اور ثقافتی ورثے کو آٹھ اقساط پر مشتمل ٹی وی سیریز کی صورت میں دستاویزی شکل دیں گے، جو سری لنکا میں نشر کی جائے گی۔
ٹیکسلا، تخت بھائی، پشاور اور سوات کے تاریخی مقامات بھی دورے میں شامل
وفد کے دورے کے آئندہ شیڈول میں وزارتِ خارجہ سے ملاقاتیں، ٹیکسلا، تخت بھائی، پشاور اور سوات کے اہم تاریخی و آثارِ قدیمہ کے مقامات اور عجائب گھروں کے دورے شامل ہیں۔ اس کے علاوہ پاکستانی تعلیمی اور ثقافتی اداروں کے نمائندوں سے بھی ملاقاتیں کی جائیں گی۔
یونیورسٹی آف سوات اور سری لنکن یونیورسٹی کے درمیان بھی معاہدہ متوقع
دورے کے دوران یونیورسٹی آف سوات اور ناگنندا انٹرنیشنل بدھسٹ یونیورسٹی کے درمیان بھی مفاہمتی یادداشت پر دستخط متوقع ہیں، جس سے تعلیمی، تحقیقی اور آثارِ قدیمہ کے شعبوں میں باہمی تعاون کو مزید وسعت ملے گی۔
گندھارا تہذیب کے عالمی تعارف اور ثقافتی روابط کے لیے اہم پیش رفت
پاکستان کا یہ اقدام گندھارا تہذیب کے عالمی تعارف، ثقافتی سفارت کاری، بین الاقوامی تعلیمی روابط اور تاریخی ورثے کے تحفظ کے لیے اہم پیش رفت قرار دیا جا رہا ہے۔
Sri Lankan Delegation Visits Pakistan to Promote Gandhara Civilization, Buddhist Heritage, Cultural Tourism, and Bilateral Cooperation.
