کوئٹہ چیمبر آف کامرس میں ہونے والی ملاقات میں پاکستان اور ایران کے درمیان تجارتی رکاوٹیں دور کرنے، سرحدی تجارت کے فروغ اور گبد-ریمدان بارڈر پر سہولیات بہتر بنانے پر زور دیا گیا۔
کوئٹہ: ایران کے قونصل جنرل محمد کریمی تودشکی نے کوئٹہ چیمبر آف کامرس اینڈ انڈسٹری کا دورہ کیا، جہاں چیمبر کے صدر حاجی محمد ایوب مریانی، نائب صدر انجینئر میروائس خان کاکڑ اور کاروباری برادری کے نمائندوں نے ان کا استقبال کیا۔
ملاقات کے دوران پاکستان اور ایران کے درمیان دوطرفہ تجارت، سرحدی تجارتی سرگرمیوں، سرمایہ کاری اور اقتصادی تعاون کے فروغ سے متعلق امور پر تبادلۂ خیال کیا گیا۔
ایران کے قونصل جنرل نے کہا کہ دونوں ممالک کے درمیان تجارت میں حائل رکاوٹوں کو دور کرنے کے لیے مؤثر اقدامات ناگزیر ہیں۔ انہوں نے یقین دلایا کہ ایران پاکستانی تاجروں کو درپیش مسائل کے حل اور تجارتی روابط کے فروغ کے لیے ہر ممکن تعاون جاری رکھے گا۔
انہوں نے بتایا کہ گبد-ریمدان سمیت سرحدی گزرگاہوں پر سہولیات کی بہتری، کسٹمز کے طریقہ کار کو آسان بنانے اور تجارتی سرگرمیوں میں تیزی لانے کے لیے متعلقہ حکام سے رابطے جاری ہیں۔
اس موقع پر صدر کوئٹہ چیمبر آف کامرس حاجی محمد ایوب مریانی نے گبد-ریمدان سرحدی گزرگاہ کو 24 گھنٹے کھلا رکھنے کا مطالبہ کرتے ہوئے کہا کہ اس سے درآمدات و برآمدات میں آسانی ہوگی اور تاجروں کو غیر ضروری تاخیر اور مالی نقصانات سے بچایا جا سکے گا۔
