وزیراعلیٰ بلوچستان میر سرفراز بگٹی نے کوئٹہ میں پولیس ڈیجیٹل انیشیٹو پروگرام کا افتتاح کردیا، 16 سافٹ ویئر اور موبائل ایپلی کیشنز کے ذریعے شہریوں کو مختلف پولیس سہولیات آن لائن فراہم کی جائیں گی۔
پولیس کی خدمات اب ڈیجیٹل پلیٹ فارم پر
کوئٹہ میں آئی جی آفس میں پولیس ڈیجیٹل انیشیٹو پروگرام کی افتتاحی تقریب منعقد ہوئی، جس میں وزیراعلیٰ بلوچستان میر سرفراز بگٹی نے پروگرام کا باقاعدہ افتتاح کیا۔ تقریب میں صوبائی وزیر داخلہ، چیف سیکریٹری بلوچستان شکیل قادر، آئی جی پولیس محمد طاہر سمیت دیگر اعلیٰ حکام شریک ہوئے۔
افتتاح سے قبل وزیراعلیٰ نے یادگارِ شہداء پر حاضری دی، پھول چڑھائے اور پولیس شہداء کو خراجِ عقیدت پیش کیا۔
16 ڈیجیٹل ایپلی کیشنز متعارف
پولیس ڈیجیٹل انیشیٹو کے تحت بلوچستان پولیس کے نظام کو جدید ٹیکنالوجی سے ہم آہنگ کیا جا رہا ہے۔ اس مقصد کے لیے 16 مختلف سافٹ ویئر اور پولیس موبائل ایپلی کیشنز متعارف کرائی گئی ہیں۔
ان ڈیجیٹل سہولیات کے ذریعے شہری گھر بیٹھے پولیس کو شکایات درج کرا سکیں گے اور ضروری معلومات بھی آن لائن فراہم کی جا سکیں گی۔ اس اقدام کا مقصد پولیس اور شہریوں کے درمیان رابطے کو آسان بنانا اور شکایات کے ازالے کے عمل کو مزید مؤثر بنانا ہے۔
تھانے میں شنوائی نہ ہو تو آن لائن شکایت
وزیراعلیٰ میر سرفراز بگٹی نے کہا کہ ڈیجیٹل ایپلی کیشنز عوامی شکایات کے ازالے میں مددگار ثابت ہوں گی اور خواتین سمیت معاشرے کے مختلف طبقات کو اس سہولت سے فائدہ پہنچے گا۔
ان کا کہنا تھا کہ اگر کسی شہری کی تھانے میں بات نہ سنی جائے تو وہ ڈیجیٹل ایپلی کیشن کے ذریعے اپنی شکایت درج کرا سکے گا، جس سے متعلقہ مسئلے کے حل میں مدد ملے گی۔
انہوں نے کہا کہ ڈیجیٹل نظام خواتین کو ہراساں کیے جانے سمیت دیگر واقعات کی روک تھام میں بھی معاون ثابت ہوسکتا ہے۔
پولیس کی سہولیات اور امن و امان پر زور
وزیراعلیٰ نے بلوچستان پولیس کو ڈیجیٹل اقدام پر مبارکباد دیتے ہوئے کہا کہ پولیس مشکل حالات کے باوجود اپنی ذمہ داریاں انجام دے رہی ہے۔ ان کے مطابق پولیس اہلکاروں کی تنخواہیں دیگر صوبوں کے برابر کرنے کے لیے بھی اقدامات کیے جا رہے ہیں۔
وزیراعلیٰ نے کہا کہ بلوچستان کے مسائل کے حل، عوام کو بہتر سہولیات کی فراہمی اور امن و امان کی صورتحال میں بہتری کے لیے اقدامات جاری ہیں۔
