کوئٹہ میں انسانی حقوق سے متعلق قومی رپورٹ کی تیاری کے لیے صوبائی مشاورتی اجلاس

کوئٹہ میں ICESCR پر صوبائی مشاورتی اجلاس، اقوام متحدہ کو پیش کی جانے والی پاکستان کی انسانی حقوق سے متعلق قومی رپورٹ کی تیاری کے لیے بلوچستان کی پیش رفت اور سفارشات کا جائزہ لیا گیا۔

وزارتِ انسانی حقوق اور حکومت بلوچستان کے اشتراک سے اہم مشاورتی اجلاس کا انعقاد

کوئٹہ: وزارتِ انسانی حقوق حکومتِ پاکستان نے ICESCR Provincial Consultation کے تحت محکمہ سماجی بہبود و انسانی حقوق بلوچستان کے اشتراک سے کوئٹہ میں معاشی، سماجی اور ثقافتی حقوق سے متعلق بین الاقوامی عہدنامے (ICESCR) پر ایک صوبائی مشاورتی اجلاس منعقد کیا۔ اجلاس میں اقوامِ متحدہ کو پیش کی جانے والی پاکستان کی دوسری دورانیہ جاتی قومی رپورٹ کی تیاری کے لیے صوبائی سطح پر ہونے والی پیش رفت اور متعلقہ اقدامات کا جائزہ لیا گیا۔

اجلاس میں وزارتِ انسانی حقوق، محکمہ قانون، محکمہ داخلہ، محکمہ محنت، بینظیر انکم سپورٹ پروگرام، محکمہ معدنیات و کان کنی، بلوچستان کمیشن آن اسٹیٹس آف وومن، سول سوسائٹی، جامعات اور دیگر متعلقہ اداروں کے نمائندوں نے شرکت کی۔

اقوام متحدہ کو پیش کی جانے والی قومی رپورٹ میں صوبوں کے کردار پر زور

وزارتِ انسانی حقوق کے ڈائریکٹر برائے بین الاقوامی تعاون ڈاکٹر عارف لغاری نے اجلاس سے خطاب کرتے ہوئے کہا کہ پاکستان نے 2008 میں معاشی، سماجی اور ثقافتی حقوق سے متعلق بین الاقوامی عہدنامے (ICESCR) کی توثیق کی تھی، جس کے تحت ملک اقوامِ متحدہ کی متعلقہ کمیٹی کو روزگار، تعلیم، صحت، سماجی تحفظ اور مناسب معیارِ زندگی سمیت مختلف شعبوں میں ہونے والی پیش رفت سے باقاعدگی سے آگاہ کرنے کا پابند ہے۔

انہوں نے کہا کہ آئین کی اٹھارہویں ترمیم کے بعد متعدد شعبے صوبائی حکومتوں کے دائرۂ اختیار میں آ چکے ہیں، اس لیے قومی رپورٹ کی تیاری میں صوبوں کی جانب سے کیے گئے قانونی، انتظامی اور پالیسی اقدامات کو شامل کرنے کے لیے ملک بھر میں مشاورتی اجلاس منعقد کیے جا رہے ہیں تاکہ UN Treaty Report میں تمام صوبوں کی پیش رفت مؤثر انداز میں شامل کی جا سکے۔

بلوچستان میں محنت، تعلیم، صحت اور خواتین کے حقوق پر تفصیلی غور

ڈاکٹر عارف لغاری کے مطابق کوئٹہ اجلاس میں بلوچستان سے متعلق اہم امور، جن میں محنت کشوں کے حقوق، سماجی تحفظ، خواتین کی ترقی، تعلیم، صحت، قدرتی وسائل کی ملکیت اور معدنیات و کان کنی کے شعبے سے متعلق معاملات شامل ہیں، پر تفصیلی تبادلہ خیال کیا گیا۔

اس موقع پر بلوچستان کمیشن آن اسٹیٹس آف وومن کی چیئرپرسن کرن بلوچ نے خواتین کے حقوق کے تحفظ، ان کی سماجی و معاشی خودمختاری، تعلیم، صحت، روزگار اور فیصلہ سازی میں مساوی مواقع کی فراہمی کی ضرورت پر زور دیا۔

شواہد پر مبنی قومی رپورٹ کی تیاری کے لیے وفاق اور صوبوں کے تعاون پر اتفاق

اجلاس کے اختتام پر متعلقہ محکموں سے قومی رپورٹ میں شامل کرنے کے لیے تازہ ترین اعداد و شمار اور معلومات جلد فراہم کرنے کی درخواست کی گئی۔ شرکاء نے وفاق اور صوبوں کے درمیان باہمی تعاون پر مبنی اس مشاورتی عمل کو پاکستان کے انسانی حقوق سے متعلق بین الاقوامی وعدوں کی تکمیل اور شواہد پر مبنی قومی رپورٹ کی تیاری کے لیے اہم قرار دیا۔

وزارتِ انسانی حقوق نے اجلاس کے کامیاب انعقاد پر حکومتِ بلوچستان، متعلقہ محکموں اور شریک اداروں کا شکریہ ادا کرتے ہوئے آئندہ بھی اس سلسلے میں تعاون جاری رکھنے کے عزم کا اظہار کیا۔