زیارت پولیس کے شہداء کی قربانیوں کے اعتراف میں میٹروپولیٹن کارپوریشن کوئٹہ نے کوئلہ پھاٹک چوک کا نام تبدیل کرکے “شہدائے زیارت چوک” رکھ دیا۔ نوٹیفکیشن کے مطابق فیصلے کا فوری اطلاق ہوگا اور متعلقہ اداروں کو سرکاری ریکارڈ میں نئے نام کے استعمال کی ہدایت جاری کر دی گئی ہے۔
کوئٹہ: میٹروپولیٹن کارپوریشن کوئٹہ نے زیارت پولیس کے شہداء کی قربانیوں کو خراجِ عقیدت پیش کرتے ہوئے کوئلہ پھاٹک چوک کا نام تبدیل کرکے “شہدائے زیارت چوک” رکھ دیا ہے۔
میٹروپولیٹن کارپوریشن کوئٹہ کی جانب سے جاری نوٹیفکیشن کے مطابق مجاز اتھارٹی کی پیشگی منظوری کے بعد یہ فیصلہ زیارت پولیس فورس کے ان شہداء کی امن، ہم آہنگی اور بلوچستان کی سلامتی کے لیے دی گئی لازوال قربانیوں کے اعتراف میں کیا گیا ہے۔
نوٹیفکیشن کے مطابق نام کی تبدیلی کا اطلاق فوری طور پر ہوگا، جبکہ متعلقہ سرکاری اداروں کو بھی اس فیصلے سے آگاہ کر دیا گیا ہے تاکہ سرکاری ریکارڈ اور دیگر امور میں نئے نام کا استعمال یقینی بنایا جا سکے۔
