بلوچستان کے مختلف اضلاع میں یومِ آزادی کی تقریبات، فلیگ مارچ، ریلیاں اور ملی نغموں کا اہتمام

سبی، سوئی، جعفرآباد، مستونگ، بارکھان، گوادر، تربت اور ڈیرہ بگٹی میں یومِ آزادی کے موقع پر فلیگ مارچ، پرچم کشائی، ریلیوں، ملی نغموں، ثقافتی پروگراموں اور دیگر تقریبات کا انعقاد کیا گیا، شہریوں نے قومی جوش و جذبے کے ساتھ جشنِ آزادی منایا۔

بلوچستان کے مختلف اضلاع میں یومِ آزادی کی تقریبات

یومِ آزادی کے موقع پر سبی میں ڈپٹی کمشنر میجر (ر) الیاس کبزئی اور ایس ایس پی عبدالحمید، جعفرآباد میں ایس ایس پی محمد معروف عثمان، مستونگ میں ڈپٹی کمشنر بہرام سلیم، بارکھان میں ڈپٹی کمشنر سعیدالرحمن کاکڑ، گوادر میں ڈپٹی کمشنر نقیب اللہ کاکڑ، تربت میں ڈپٹی کمشنر کیچ یاسر اقبال دشتی اور ڈیرہ بگٹی میں ایڈیشنل ڈپٹی کمشنر کی قیادت میں مختلف تقریبات کا انعقاد کیا گیا۔

تقریبات میں پرچم کشائی، قومی ترانے، پولیس دستوں کی سلامی، فلیگ مارچ، ریلیوں اور پاکستان سے محبت کے اظہار کے لیے مختلف سرگرمیوں کا اہتمام کیا گیا، جبکہ ضلعی انتظامیہ، پولیس، ایف سی، سرکاری افسران، سیاسی و قبائلی شخصیات، سول سوسائٹی اور شہریوں نے شرکت کی۔

گوادر، تربت اور ڈیرہ بگٹی میں بھی پرچم کشائی کے بعد ریلیاں نکالی گئیں، جن میں شرکاء نے سبز ہلالی پرچم، بینرز اور پلے کارڈز اٹھا رکھے تھے۔ پاکستان زندہ باد کے نعروں اور قومی جذبے سے بھرپور ان ریلیوں میں شہریوں کی بڑی تعداد نے شرکت کی۔

سوئی میں ملی نغموں اور آتش بازی سے جشن کی رونقیں

سوئی کے ایف سی سٹیڈیم میں میوزیکل پروگرام کا انعقاد کیا گیا، جس میں مقامی فنکاروں نے ملی نغمے اور گیت پیش کیے جبکہ ثقافتی پرفارمنس نے تقریب کو مزید یادگار بنا دیا۔ پاکستان زندہ باد کے نعروں سے اسٹیڈیم گونجتا رہا اور رات گئے آتش بازی سے جشن کی خوشیاں دوبالا ہوگئیں۔

Pakistan Independence Day celebrations across Balochistan highlighted unity, patriotism, peace, and national pride.

قومی یکجہتی، امن اور ملکی ترقی کے عزم کا اظہار

فلیگ مارچ، ریلیوں اور دیگر تقریبات میں شرکاء نے سبز ہلالی پرچم تھام کر قومی یکجہتی، امن، سلامتی اور ملکی استحکام کا پیغام اجاگر کیا۔ مختلف اضلاع میں پاکستان کی سلامتی، ترقی اور خوشحالی کے لیے خصوصی دعائیں کی گئیں جبکہ گوادر، تربت اور ڈیرہ بگٹی سمیت مختلف مقامات پر یومِ آزادی کی خوشی میں کیک بھی کاٹے گئے۔

مستونگ میں یادگارِ شہدائے لیویز و پولیس پر پھول چڑھائے گئے جبکہ مختلف اضلاع کے عوامی نمائندوں اور ضلعی انتظامیہ نے کہا کہ آزادی ہمارے بزرگوں کی عظیم جدوجہد اور قربانیوں کا ثمر ہے۔ قومی اتحاد، باہمی اخوت اور اجتماعی کوششوں کے ذریعے پاکستان کو مزید مضبوط، مستحکم اور ترقی یافتہ بنانے کے لیے ہر شہری کو اپنا کردار ادا کرنا ہوگا۔

مختلف اضلاع کی انتظامیہ نے اس عزم کا اظہار کیا کہ نوجوانوں اور شہریوں کے لیے مثبت سرگرمیوں کے ساتھ امن و امان کے قیام، عوام کے تحفظ اور ملکی ترقی کے لیے ادارے باہمی تعاون سے اپنی ذمہ داریاں جاری رکھیں گے۔