پاکستان ہاؤس سوئی میں ہتھیار ڈالنے کی تقریب، پاکستان سے وفاداری کا حلف
فراری کمانڈر نور خان بگٹی نے اپنے ساتھیوں اور خاندان کے افراد سمیت مجموعی طور پر 60 افراد کے ہمراہ پاکستان ہاؤس سوئی میں وزیراعلیٰ بلوچستان میر سرفراز بگٹی کے سامنے ہتھیار ڈال دیے اور قومی دھارے میں واپسی اختیار کرلی۔ اس موقع پر نور خان بگٹی اور ان کے ساتھیوں نے پاکستان سے وفاداری کا حلف بھی اٹھایا۔
وزیراعلیٰ کی کھلی کچہری کے دوران اہم پیش رفت
یہ پیش رفت وزیراعلیٰ بلوچستان میر سرفراز بگٹی کی سوئی میں منعقدہ کھلی کچہری کے دوران سامنے آئی۔ فراہم کردہ معلومات کے مطابق نور خان بگٹی گزشتہ 20 سال سے پہاڑوں میں روپوش تھے اور ماضی میں متعدد دہشت گردی کی کارروائیوں میں ملوث رہے ہیں۔ قومی دھارے میں واپسی کے بعد وہ اپنے خاندان سمیت سوئی میں آباد ہوں گے۔
پائیدار امن اور قومی یکجہتی پر وزیراعلیٰ بلوچستان کا مؤقف
اس موقع پر وزیراعلیٰ بلوچستان میر سرفراز بگٹی نے کہا کہ ریاست پاکستان سے وفاداری، آئین و قانون کی پاسداری اور قومی یکجہتی پائیدار امن اور ترقی کی بنیاد ہیں۔ بلوچستان سمیت ملک کے ہر علاقے میں امن و استحکام کا قیام قومی ذمہ داری ہے، جس کے لیے ریاست کی رٹ تسلیم کرنا اور تشدد کا راستہ ترک کرنا ضروری ہے۔
تشدد کا راستہ ترک کرکے ترقی میں کردار ادا کرنے کی اپیل
وزیراعلیٰ نے کہا کہ پاکستان ہم سب کا مشترکہ وطن ہے اور اس کی سلامتی، خودمختاری اور استحکام پر کوئی سمجھوتہ نہیں کیا جا سکتا۔ ریاست کے ساتھ کھڑے ہوکر ہی عوام کے جان و مال کا تحفظ، معاشی ترقی، تعلیم کا فروغ اور نوجوانوں کے روشن مستقبل کو یقینی بنایا جا سکتا ہے۔
ر وزیراعلیٰ بلوچستان میر سرفراز بگٹی نے مزید کہا کہ بلوچستان کے عوام امن، ترقی اور خوشحالی چاہتے ہیں۔ صوبے کے نوجوان اپنی صلاحیتیں قومی ترقی کے لیے بروئے کار لائیں اور پاکستان کی تعمیر و ترقی میں اپنا کردار ادا کریں۔
بلوچستان میں امن کے لیے اجتماعی کوششوں پر زور
وزیراعلیٰ بلوچستان کے مطابق قومی دھارے میں واپسی کا فیصلہ متعلقہ افراد، ان کے خاندانوں اور علاقے کے مستقبل کے لیے اہم ثابت ہوسکتا ہے۔ انہوں نے کہا کہ صوبے میں پائیدار امن کے قیام کے لیے ریاستی ادارے اپنی ذمہ داریاں ادا کر رہے ہیں، جبکہ قومی یکجہتی، قانون کی بالادستی اور ترقی کے مشترکہ اہداف کے حصول کے لیے معاشرے کے تمام طبقات کا تعاون بھی ضروری ہے۔
سوئی میں نور خان بگٹی سمیت 60 افراد کی قومی دھارے میں واپسی کو علاقے میں امن و استحکام کی کوششوں کے تناظر میں اہم پیش رفت قرار دیا جا رہا ہے۔
Former militant commander Noor Khan Bugti and 60 others surrender in Sui, Balochistan, and pledge allegiance to Pakistan in the presence of CM Mir Sarfraz Bugti.
