سبی کی محمودزئی اسٹریٹ میں ٹف ٹائلز اور اسٹریٹ لائٹس نصب، تربت کے پاک سویٹ ہوم میں 70 لاکھ روپے کی لاگت سے سولر منصوبہ جاری
کوئٹہ: بلوچستان اسپیشل ڈویلپمنٹ انیشیٹو (بی ایس ڈی آئی) فیز تھری کے تحت صوبے کے مختلف علاقوں میں شہری سہولیات کی بہتری اور عوامی فلاح و بہبود کے لیے ترقیاتی منصوبوں پر عملدرآمد جاری ہے۔ اس سلسلے میں سبی میں لونی روڈ محمودزئی اسٹریٹ میں ٹف ٹائلز اور اسٹریٹ لائٹس کی تنصیب کا منصوبہ مکمل کر لیا گیا ہے، جبکہ تربت کے پاک سویٹ ہوم میں سولر سسٹم کی تنصیب کا کام 80 فیصد مکمل ہو چکا ہے۔
سبی میں شہری انفراسٹرکچر کی بہتری کا منصوبہ مکمل
سبی میں ڈپٹی کمشنر میجر (ر) الیاس کبزئی اور 122 ونگ کے کرنل عبدالمنان نے مختلف محکموں کے افسران کے ہمراہ لونی روڈ محمودزئی اسٹریٹ میں مکمل ہونے والے ترقیاتی منصوبے کا معائنہ کیا اور کام کے معیار کا جائزہ لیا۔
اس موقع پر ڈپٹی کمشنر سبی نے کہا کہ بی ایس ڈی آئی کا مقصد عوام کو بنیادی شہری سہولیات فراہم کرنا، انفراسٹرکچر کو بہتر بنانا اور شہری علاقوں کی خوبصورتی میں اضافہ کرنا ہے۔ انہوں نے کہا کہ ترقیاتی منصوبوں کی نگرانی کا سلسلہ جاری رکھا جائے گا تاکہ ان کے ثمرات براہِ راست عوام تک پہنچ سکیں۔
منصوبے کی تکمیل سے محمودزئی اسٹریٹ میں آمدورفت کی سہولت بہتر ہونے کے ساتھ رات کے اوقات میں اسٹریٹ لائٹس کے ذریعے روشنی کا مناسب انتظام بھی ممکن ہوگا۔
تربت کے پاک سویٹ ہوم میں سولر سسٹم کی تنصیب جاری
دوسری جانب تربت کے پاک سویٹ ہوم میں یتیم بچوں کو بجلی کی بہتر اور مستقل سہولت فراہم کرنے کے لیے بی ایس ڈی آئی فیز تھری کے تحت 70 لاکھ روپے کی لاگت سے سولر سسٹم نصب کیا جا رہا ہے، جس پر اب تک 80 فیصد کام مکمل کر لیا گیا ہے۔
بی ایس ڈی آئی کے انجینئر محمد عالم نے منصوبے کا دورہ کیا اور جاری کام کی پیش رفت کا جائزہ لیا۔
یتیم بچوں کو بہتر تعلیمی اور رہائشی سہولیات کی فراہمی کا اقدام
سولر سسٹم کی تنصیب سے پاک سویٹ ہوم میں بجلی کی فراہمی بہتر ہونے اور توانائی کے اخراجات میں کمی آنے کی توقع ہے، جس سے ادارے میں مقیم یتیم بچوں کی تعلیم، رہائش اور روزمرہ ضروریات کے لیے سہولیات میں بہتری آئے گی۔
منصوبے کی تکمیل سے پاک سویٹ ہوم کو توانائی کا ایک بہتر اور مستحکم نظام میسر آئے گا، جس سے بچوں کے لیے سازگار ماحول فراہم کرنے میں مدد ملے گی۔
بی ایس ڈی آئی فیز تھری کے تحت جاری یہ منصوبے صوبے میں شہری انفراسٹرکچر کی بہتری، فلاحی اداروں کو بنیادی سہولیات کی فراہمی اور عوامی فلاح و بہبود کے اقدامات کو مؤثر بنانے میں اہم کردار ادا کر رہے ہیں
۔Balochistan Accelerates BSDI Phase III Projects in Sibi and Turbat, Improving Urban and Welfare Facilities
