بلوچستان میں طبی تعلیم اور پوسٹ گریجویٹ تربیت کے فروغ کے لیے اداروں کا تعاون ناگزیر ہے، گورنر جعفر خان مندوخیل

نوجوان ڈاکٹروں کو اعلیٰ طبی تعلیم اور جدید تربیت صوبے میں فراہم کرنے کے لیے اقدامات کیے جائیں گے، سی پی ایس پی کے وفد سے ملاقات

کوئٹہ: گورنر بلوچستان جعفر خان مندوخیل نے کہا ہے کہ کالج آف فزیشنز اینڈ سرجنز پاکستان (CPSP) جیسے ادارے طبی شعبے میں پیشہ ورانہ مہارت، تخصص اور عملی تربیت کے فروغ میں اہم کردار ادا کررہے ہیں۔ صوبے کے نوجوان ڈاکٹروں کو اعلیٰ طبی تعلیم اور جدید تربیت کی سہولیات بلوچستان ہی میں فراہم کرنے کی ضرورت ہے تاکہ انہیں پیشہ ورانہ قابلیت کے حصول کے لیے دوسرے شہروں کا رخ نہ کرنا پڑے۔

سی پی ایس پی کے وفد کی گورنر بلوچستان سے ملاقات

ان خیالات کا اظہار انہوں نے گورنر ہاؤس میں کالج آف فزیشنز اینڈ سرجنز پاکستان کے وفد سے ملاقات کے دوران کیا۔ وفد کی قیادت ڈاکٹر عائشہ صدیقہ کررہی تھیں، جبکہ پروفیسر ڈاکٹر سامیہ سیف اللہ، پروفیسر اسماء اپل، پروفیسر فضل داد کاکڑ، پروفیسر حبیب اللہ اور ڈاکٹر رضوانہ بھی وفد میں شامل تھے۔

ملاقات میں بلوچستان میں طبی تعلیم، میڈیکل ریسرچ، پوسٹ گریجویٹ تربیت اور صحت کے شعبے میں اعلیٰ پیشہ ورانہ تعلیم کے فروغ سے متعلق امور پر تبادلہ خیال کیا گیا۔

طبی تعلیم اور جدید تحقیق کے فروغ پر زور

گورنر بلوچستان نے کہا کہ میڈیکل یونیورسٹیاں اور کالجز عموماً تدریسی و تحقیقی سرگرمیوں اور ڈگری پروگرامز پر توجہ دیتے ہیں، جبکہ سی پی ایس پی جیسے ادارے ڈاکٹروں کی تخصصی اور عملی تربیت میں اہم کردار ادا کرتے ہیں۔ طبی اداروں کے درمیان باہمی تعاون کو مضبوط بنا کر جدید طبی علوم اور تحقیقی سرگرمیوں کو فروغ دیا جاسکتا ہے۔

تربت اور لورالائی میں سی پی ایس پی مراکز کی استعداد کار بڑھانے کی ضرورت

انہوں نے تربت اور لورالائی میں سی پی ایس پی کے مراکز کی اہمیت پر زور دیتے ہوئے کہا کہ ان مراکز کی استعداد کار اور تربیتی سہولیات میں بہتری سے صوبے بھر کے ڈاکٹروں کو فائدہ پہنچ سکتا ہے۔

بلوچستان میں طبی سہولیات بہتر بنانے کے عزم کا اعادہ

گورنر جعفر خان مندوخیل نے طبی تعلیم، جدید تحقیق اور پوسٹ گریجویٹ تربیت کے فروغ کے لیے متعلقہ اداروں کے ساتھ تعاون مزید بڑھانے کے عزم کا اظہار کرتے ہوئے کہا کہ ان اقدامات سے بلوچستان میں طبی سہولیات کا معیار بہتر بنانے کے ساتھ مقامی طبی ماہرین کی پیشہ ورانہ صلاحیتوں میں بھی اضافہ ہوگا۔

Governor Balochistan Jaffar Khan Mandokhail Calls for Improved Medical Education and Postgraduate Training Facilities in the Province