وزیراعلیٰ بلوچستان میر سرفراز بگٹی شمالی ڈیرہ بگٹی پہنچ گئے، قبائلی عمائدین سے ملاقات

وزیراعلیٰ بلوچستان میر سرفراز بگٹی نے اپنے آبائی علاقے شمالی ڈیرہ بگٹی میں قبائلی عمائدین اور عوام سے ملاقاتیں کیں، علاقائی صورتحال اور عوامی مسائل پر گفتگو کی اور متعدد شکایات کے فوری حل کے لیے موقع پر احکامات جاری کیے۔

عوامی مسائل کے فوری حل کی ہدایت

وزیراعلیٰ میر سرفراز بگٹی نے قبائلی عمائدین اور اپنے حلقے کے عوام سے روایتی بلوچی حال احوال کیا اور مختلف محکموں سے متعلق شکایات سنیں۔ انہوں نے افسران کو ہدایت کی کہ عوامی خدمت کو اپنی اولین ترجیح بنائیں۔

انہوں نے کہا کہ عوامی مسائل کا مقامی سطح پر فوری حل انہیں صوبائی دارالحکومت آنے کی مشکلات سے بچا سکتا ہے، اس لیے دور افتادہ علاقوں میں گورننس بہتر بنانے کے لیے مؤثر طریقہ کار مرتب کیا جا رہا ہے۔

تعلیم اور امن حکومت کی ترجیحات

وزیراعلیٰ نے کہا کہ بلوچستان میں سینکڑوں بند اسکول دوبارہ کھول کر فعال کیے گئے ہیں، کیونکہ تعلیم ہی ملک، قوم اور خاندانوں کی ترقی کی بنیاد ہے۔

انہوں نے کہا کہ دہشتگردی کے خلاف سیکیورٹی فورسز کی کارروائیاں صوبے میں امن کی ضامن ہیں۔ دہشتگرد نہتے لوگوں کو نشانہ بنا کر انسانیت سے عاری ہوچکے ہیں جبکہ امن کے قیام کے لیے سیکیورٹی فورسز کی قربانیاں ناقابلِ فراموش ہیں۔

Balochistan government prioritizes education, local governance and peace for its people.

شہداء کو خراجِ عقیدت

میر سرفراز بگٹی نے کہا کہ جشنِ آزادی کی خوشیوں میں قوم اپنے عظیم شہداء کو نہیں بھولی اور ان کی قربانیوں کو خراجِ عقیدت پیش کرتی ہے۔

اس موقع پر قبائلی عمائدین نے وزیراعلیٰ بلوچستان سے ملاقات اور عوامی مسائل کے حل کے لیے فوری اقدامات پر ان کا شکریہ ادا کیا۔